《自由亞洲電台》報道，港府截至9月嘅財政年度頭五個月已經錄得超過2000億赤字，連建制派都出聲質疑，指港府難以達到《基本法》「力求收支平衡」嘅要求。財經事務及庫務局只係回應議員，表示會控制開支增長、增加收入、發行政府債券等，希望數年內重返平衡。有財經評論認為，本年度財赤過千億係一定會發生，並預計開源措施即變相「加稅」在所難免。

立法會喺颱風後復會，繼續對《施政報告》進行致謝動議辯論。立法會議員田北辰開腔未致謝就先質疑政府對零售業支持力度不足，直指香港零售業呢十幾年嚟最慘淡，批評政府唔理解核心問題，指之前搞廟街、無人機、煙火，雖然吸引到啲遊客打完卡就走，但無幫到佢哋留低消費。

財政司長陳茂波報告香港經濟狀況時隻字未提赤字問題，反而強調《施政報告》守正創新、準確應變，提出咗一系列措施，以推動香港經濟發展。但現實係，零售市道慘淡，賣地收入更係遠遜預期，由全年預測330億至今只有7.2億，令建制派新民黨議員何敬康都喺書面質詢中質疑港府2026至2027年恢復盈餘嘅目標過於樂觀，並指若財赤持續，政府恐怕難守《基本法》平衡預算嘅規定。

對此，財經事務及庫務局長許正宇回覆書面表示政府有決心克服公共財政挑戰，會控制開支增長、增加收入及發行政府債券，逐步收窄財赤，力求數年內恢復收支平衡。

財經評論員顏寶剛指出，香港財政壓力驚人，指事實上雖然陳茂波喺2月全面撤辣，《施政報告》亦放寬按揭成數，但地產市場、樓市依然沉底，印花稅收入或有改善，但股市成交反彈不明顯。佢認為綜合多方因素，過千億財赤係必然，甚至可能低估。

顏寶剛指第三季GDP按年僅1.8%增長，係18個月以嚟最差，經濟增長乏力，必然需要節流及開源兩方面措施。然而，政府不願意削減公務員薪酬等大開支，開源成為唯一出路，未來或需考慮利得稅、薪俸稅，甚至新徵消費稅、資本增值稅等。

德勤日前估計，港府今個財政年度赤字可能超過1000億，財政儲備或降至約6000億。德勤建議港府推新稅務優惠，以吸引國際貿易及資本流入香港，增加收入來源。《I》