隨住美國總統大選結果出爐，特朗普當選引起一場生育權風暴，唔少女性即刻行動起嚟，擔心特朗普政府上任後會進一步收緊墮胎同生育選擇權。為咗應對呢個政策變數，好多人開始儲緊急避孕藥同墮胎藥，有啲甚至計劃裝置子宮內避孕器，甚至決定做結紮手術，想喺政策環境未明朗嘅情況下，自己掌控生育選擇。

根據多間藥物墮胎服務提供商嘅報告，特朗普勝出選舉後幾個鐘內，米非司酮同米索前列醇等墮胎藥需求大增。非牟利組織 Aid Access 表示，喺選舉第二日，請求墮胎藥嘅數量激增至平日嘅17倍，由平日嘅600單急升至10,000單，而緊急避孕藥 Cadence OTC 嘅訂單量亦喺選後一日內達到平時一星期嘅五倍。

遠距生殖健康公司 Wisp 嘅行政總裁莫妮卡·塞帕克（Monica Cepak）話，自選舉後，平台上避孕藥同墮胎藥嘅需求顯著增加，緊急避孕藥銷量飆升達到1650%。對於住喺限制墮胎嘅州份嘅女性嚟講，特朗普嘅當選令佢哋對未來生育選擇權嘅不確定性倍感憂慮。

雖然特朗普今次選舉表現得相對溫和，話會將墮胎問題交由各州決定，並保留強姦、亂倫同生命危險嘅例外情況，但佢之前推動推翻羅訴韋德案（Roe v. Wade）嘅角色令唔少墮胎權倡導者對佢可能推行嘅政策持高度戒備。若特朗普進一步收緊墮胎權，唔排除會阻止郵寄墮胎藥，甚至比各州有權落實更嚴格嘅禁令，繼續抗衡拜登政府放寬嘅生育措施。

美國著名案例「羅訴韋德案」（Roe v. Wade），自1973年起一直被視為保障美國女性墮胎選擇嘅關鍵判決，但呢項裁決已經喺2022年被美國聯邦最高法院正式推翻，掀起軒然大波。呢宗案件當年令最高法院裁定女性嘅墮胎選擇係受憲法保障嘅私隱權之一，從而推翻咗好多州分同聯邦嘅反墮胎法例。然而，呢個判決從來都唔係冇爭議，成為美國社會一大撕裂點，關於墮胎應否合法、由邊個決定、道德同宗教係咪應該參與其中，呢啲問題至今依然分歧重重。

呢個案件係由一名被稱為「珍·羅」（John Doe）嘅女性（真名諾瑪·麥考維Norma Leah Nelson McCorvey ）於1969年發起，當時佢已經懷上第三胎，但並唔想生育。佢所居住嘅德州法律規定，除非孕婦生命受到威脅，否則唔允許進行墮胎。喺律師幫助之下，佢將當地地方檢察官韋德告上聯邦法院，指控德州反墮胎法違憲。

1973年1月22日，聯邦最高法院以7比2通過判決，指出美國憲法第十四修正案嘅「正當法律程序」條款保障咗女性基本嘅「私隱權」，墮胎因此受憲法保護，並將墮胎權列為「基本權利」。

羅訴韋德案係美國司法史上最具爭議嘅裁決之一，反墮胎團體同保守派政客一直不斷推動推翻呢個判決。2022年6月24日，最高法院最終喺「多布斯訴積遜婦女健康組織案」中以5比4嘅裁決，正式推翻羅訴韋德案，將墮胎權嘅決定權交還畀各州處理。呢項決定意味住美國唔再擁有聯邦層面嘅墮胎權保障，唔少州開始推出嚴格嘅反墮胎法。

由於新一屆國會由共和黨控制，唔少美國女性為咗應對未來潛在嘅限制，已經紛紛將避孕計劃提前，甚至考慮更長期嘅生育控制方案，好似裝置子宮內避孕器同輸卵管結紮等。專家指出，呢個趨勢反映出女性喺政策不穩定下已經著手準備，務求確保自己嘅生育選擇權唔會被剝奪，做好萬全準備應對更嚴格嘅生育限制。《I》