香港今早首度試行「打風不停市」措施，有證券行員工表示，為應對風球安排，比平日提早上班，並指公司喺週末已做足準備及演練。有證券商指出，今朝生意同平日無太大分別，但期望政府下一步研究打風下交通安排，以便金融業從業員返工更方便。

香港證券及期貨專業總會會長陳志華表示，暫時未有業界反映返工困難，不過關注惡劣天氣下，部分銀行分行暫停營業，可能會影響客戶及券商嘅存款安排。他指出，有部分投資者可能要喺風球前先存錢到股票戶口，以應對「補倉」等突發投資需求。陳志華指，今日天氣算未算太惡劣，

業界普遍安排約一半人手先返回公司，員工嘅出行方面亦未見有受阻礙情況。他認為之前嘅測試及市場演習都係喺好天氣進行，未必完全反映惡劣天氣嘅風險。不過，今次打風僅維持一個多小時交易時間，算係小試牛刀，無遇到太大挑戰。陳志華強調，隨住極端天氣日漸頻繁，期望政府同業界可以制定更詳細嘅應變方案，確保唔會影響香港作為國際金融中心嘅聲譽。

耀才證券（01428）行政總裁許繹彬指，港交所（00388）今次「打風不停市」措施，對公司運作影響唔大，客戶可以正常通過網上平台開戶、交易、存取款項等一切如常。許繹彬認為，港交所今次推出「打風不停市」政策，雖然未必即時增加成交量，但係對標國際市場，與世界接軌，喺八號風球下港股成交保持2000億水平，對於香港庫房嘅印花稅收入會有正面幫助，可謂百利而無害。

許繹彬補充，公司平時喺八號風球或黑雨情況下，員工仍需上班值守，應付環球股票及期貨市場（如內地A股、日本股票、美國期貨）嘅交易及交收，客戶早已習慣透過24小時EDDA存款服務完成買賣。

市況方面，港股今日上午下跌百點以上，恒指喺早上八號風球下開市，低開197點，早段曾經倒升，其後再度回落，恒指半日收跌173點，報19649點，成交815億元。科指亦跌1.4%，報4392點。騰訊（00700）業績公佈後逆市上升逾1%，美團（03690）跌逾2%。內房股早段高開但隨後回落，龍湖（00960）跌5%，微盟（02013）同金山雲（03896）則逆市上升超過17%。《I》