日本政壇昨日（11日）再掀起話題，自民黨總裁石破茂於特別國會上經兩輪決選，以221票成功連任日本首相，擊敗在野黨立憲民主黨總裁野田佳彥。然而，石破喺投票過程中被拍到疑似打瞌睡嘅畫面，隨即喺網上引起瘋傳，甚至成為熱搜關鍵字，引起輿論熱議。不少網民表示關注佢嘅健康狀況，亦有在野黨議員同反對者冷嘲熱諷，指日本首相竟然係個瞓著嘅男人。

根據日本媒體報道，石破喺第一輪投票期間疑似打瞌睡，而當時坐喺佢隔離嘅內閣官房長官林芳正似乎猶豫緊係咪應該叫醒佢。雖然石破瞌睡狀態僅維持約1分鐘左右，但呢一幕喺網上引發廣泛討論，對於近期自民黨形象不佳同民意調查低落嘅情況，有部分民眾對石破嘅領導能力再添疑慮。

對於此事，日本內閣官房長官林芳正喺當晚記者會上解釋，指石破近日因感冒有服藥：「據我了解，除咗感冒之外，佢嘅健康狀況冇問題」。隨住新內閣即將成立，林芳正強調新班子將繼續致力推動政策。

同日晚上，石破第二次內閣正式成軍，相較於第一次石破內閣，成員上只有三人有異動，分別係江藤拓出任農林水產大臣、鈴木馨祐接任法務大臣同中野洋昌接掌國土交通大臣，其餘大臣留任不變。

根據富士新聞網報道，國會參眾兩院當日分別進行首相指名選舉，最終石破成功連任為第103任日本首相。不過，佢喺眾議院未能取得過半數支持，而第二輪投票中廢票多達84張，顯示出石破喺國會內部支持率有所不足。

NHK報道指，石破喺第一輪投票中獲得221票，立憲民主黨嘅野田佳彥取得151票，日本維新會嘅馬場伸幸得38票，而國民民主黨代表玉木雄一郎則取得28票。由於無人過半數，選舉進入第二輪投票。結果石破維持221票，而野田佳彥得票增加至160票，廢票則有84張。

參議院方面，自民黨聯盟憑借125席優勢，令石破以142票被指名為首相，野田僅獲得46票。產經新聞指出，石破雖然順利連任，但係佢喺第二輪投票中僅取得相對多數，成為自1979年以嚟首位無過半支持當選嘅自民黨首相，喺過往45年都未見過類似情況。

日本首相指名選舉制度採用兩輪投票機制，通常喺第一輪便能獲得過半數票數確認當選首相，若無人過半則進行第二輪，由票數最多者當選。根據眾議院規定，第二輪投票無需過半數，只需「相對多數」即能勝出。

二戰後日本眾議院僅四次進行首相指名第二輪投票，最近一次已經係30年前嘅1994年。其中最著名嘅例子發生喺1979年，當時自民黨內部分裂爆發「40日抗爭」，最終以未達過半嘅138票，由大平正芳險勝同黨嘅福田赳夫。《I》