中國當局過去一直誇耀國內基礎建設「超英趕美」，不停舉債起新嘅項目，依家地方政府沉重嘅債務問題開始陸續爆發。廣西柳州市由於舉債大興土木、建設地鐵輕軌等，最後成為「爛尾工程」。前柳州市委書記鄭俊康因此被判刑16年半。柳州市委昨日公開認同此事屬「爛尾」，並宣佈要全力整治，開始拆除停工嘅高架墩柱。

柳州市喺鄭俊康主導下，從2016年起大規模展開地鐵同輕軌等軌道交通工程，2018年更規劃出7條長達226公里嘅線路。但由於舉債過度，加上資金供應中斷，工程於2022年相繼停工，成為大批輕軌高架樑柱爛尾，市容交通大受影響，引起柳州市民廣泛不滿。

根據《北京日報》報道，鄭俊康因違規啟動未經國務院批覆嘅城市軌道交通項目，被判16年半徒刑。據了解，佢係喺未獲國務院批覆嘅情況下，要求相關單位透過舉債融資等方式，啟動柳州城市軌道交通工程，最終導致資金鏈斷裂，成為爛尾。

柳州市委常委會於11日召開擴大會議，通報鄭俊康案，並專題研討佢留下嚟嘅「政績工程」——即呢個軌道交通系統嘅「綜合整治工作」。會議坦誠指出，呢個工程已形成爛尾，唔單止嚴重影響城市交通同環境，更對柳州經濟社會發展造成不可挽回嘅重大損失，為城市背上沉重包袱。

會議經過「深入科學論證」，確認該軌道工程已不可行，甚至改造再利用都無法實行。會議強調，必須「深刻反省、引以為戒」，堅決放棄幻想，落實整改，全力整治爛尾工程。

報道指，對於市內「有安全隱患、阻礙交通、影響市容」等爛尾墩柱同附屬設施，市委要求柳州市軌道集團即刻展開拆除。現時已經拆除部分區域，並正持續清理其他高架墩柱。政府同時諮詢專業機構同權威專家嘅意見，計劃進一步論證「哪些需要拆除、哪些可以改造或再利用」，務求最大限度減少損失。

不過，市委同時強調，全市黨員、幹部同市民要「不信謠、不傳謠」，維護柳州城市形象。對於編造、傳播謠言嘅違法行為，將嚴肅依法查處，確保社會穩定。

而喺2023年11月，中國財政部就公佈咗8件地方政府隱性債務案例，柳州市於2018年至2021年間要求當地國企墊資興建軌道交通，造成隱性債務增加至176.95億元人民幣，成為典型案例。《I》