港鐵宣布加強推廣「扶手電梯左右企穩」新措施，提醒市民喺電梯上要注意安全，盡量做到「企左邊、緊握扶手」，而唔係「左行右企」。近來港鐵扶手電梯意外頻發，單喺今年頭9個月已經錄得430宗相關意外。不過亦有教導職員，如果遇乘客要求「都要借借」，留意自己安全。

港鐵車務營運及本地鐵路總管李婉玲今早接受商台節目《在晴朗的一天出發》訪問時指出，港鐵將喺未來一個月大力宣傳扶手電梯安全訊息，並安排穿著紅色背心嘅「扶手電梯安全大使」喺唔同車站提醒市民。佢強調今次宣傳係希望市民意識到「企左邊緊握扶手」先至係安全做法，透過示範教育讓社會逐步接受新措施。

李婉玲表示，隨著香港人口逐漸老化，扶手電梯意外愈來愈多，特別係由於乘客未有緊握扶手而導致失平衡跌倒嘅情況時有發生，亦有人因為攜帶大型行李或在電梯上行走撞到其他乘客。佢透露，曾經有小朋友企喺電梯左邊，家長拉開小朋友讓路時，小朋友失平衡向後跌，結果連累後面4至5名乘客一同跌倒。李婉玲承認「左行右企」係香港人多年養成嘅習慣，但強調喺電梯上行走嘅風險高，有可能引發「嚴重嘅後果」，佢希望通過不斷嘅宣傳教育，令到全社會逐步接受新嘅安全指引。

當被問到港鐵會唔會考慮將「企定定」納入港鐵附例時，李婉玲未有正面回應，亦未有回答是否因為法律責任嘅考量而進行推廣。佢只係一再強調意外「一單都嫌多」，港鐵重視乘客安全係首要考量。佢補充，「扶手電梯安全大使」主要喺非繁忙時段出動，並會提醒攜帶大型行李或推嬰兒車嘅乘客使用升降機，從而減少意外發生。

選委界立法會議員江玉歡喺同一節目中指出，法院喺2002年處理一宗發生喺荃灣地鐵站嘅扶手電梯意外案件時判決指，如果乘客未有緊握扶手，意外發生後就難以索賠。當時判詞指出，扶手電梯作為機械設備，隨時有可能停頓，而使用者有責任保持警覺，緊握扶手，否則發生意外就較難申索成功。江玉歡直言，唔緊握扶手嘅乘客「輸嘅機會好大」。

對於港鐵推廣「左右企」措施，江玉歡認為涉及風險管理。一旦意外發生，若乘客指出港鐵「容許」電梯上行走，申索責任可能會歸咎於港鐵「未禁止行走」，而官司可能會因此變得麻煩。「到時打官司會麻煩啲」，因為行走時難以緊握扶手，乘客或有機會推港鐵「容許」行走為責任歸屬原因，這就為港鐵增加風險。

江玉歡提到，日本有地鐵站已經採用AI人工智能，通過廣播系統不斷提醒乘客遵守扶手電梯安全指引，或許可作為香港推動安全措施嘅一個參考方案。《I》