《自由亞洲電台》報導，隨住特朗普宣佈再次當選美國總統，中國一方面迅速通過增加地方政府6萬億人民幣嘅債務限額，同時又派遣港澳辦主任夏寶龍南下召見香港官員同工商界人士，要求以「行動」詮釋愛國愛港，呢啲舉動顯示出中國喺經濟問題上可能已經無計可施。

全國人大常委會會議上周五（8號）閉幕，表決通過批准國務院提請增加地方政府6萬億人民幣債務限額，以置換存量隱性債務。財政部長藍佛安指出，呢個新債務限額會喺三年內逐步實施，每年兩萬億，以支持地方政府化解各類隱性債務，確保經濟穩定運行，亦係為未來幾年做好嘅「重大部署」。

藍佛安進一步解釋，地方嘅隱性債務總額會喺2028年之前由14.3萬億大幅降至2.3萬億，平均每年嘅化債額由2.86萬億減至4600億，減輕化債壓力。

有評論指，特朗普競選政綱中表明會對中國貨物徵收高達六成嘅關稅，中國以低息債換高息債正係應對策略。一旦中國長期倚賴嘅外貿收入大幅縮減，化債所節省嘅支出可為地方政府釋放更多財政資源，以刺激內需。

與此同時，上周五（8號），港澳辦主任夏寶龍喺深圳舉辦座談會召見香港工商界。出席嘅包括特區政府高層同李澤楷、郭炳聯、吳天海、羅康瑞等商界巨頭。會後，特首李家超透過社交媒體發文，僅提到夏寶龍要求深入學習習近平主席嘅「重要回信精神」。其他出席嘅主要官員喺社交媒體嘅回應都未有提及夏寶龍嘅「指示」。

直至周日晚（10號）港澳辦先發新聞稿交代，當中提到夏寶龍嘅「指示」，指香港唔可以淨係靠傳統優勢「一招鮮、吃遍天」，必須要主動求變、改革創新。

夏寶龍喺7小時嘅座談會上強調，香港工商界要識變、應變、求變，堅定對香港同國家發展嘅信心，透過行動表現出愛國愛港。佢指出香港嘅港口地位依然重要，但貨運同物流嘅角色應該轉交內地，而香港要發展高端產業如買賣同保險。

雖然呢場會議名義上係工商界座談會，但港澳辦新聞稿顯示，夏寶龍嘅「重要指示」針對嘅唔單止係針對商界，亦針對特區政府。

夏寶龍提出香港應以「港」為名，加強陸、海、空三方面嘅港口建設，改革傳統模式，為香港帶嚟新出路。佢強調今日嘅香港唔可以再靠舊有優勢，而係要積極改革，主動創新。工商界係推動經濟發展嘅主力，應該勇於承擔、挺身而出，主動識變、應變、求變，以行動詮釋愛國愛港精神，推動香港同國家共同繁榮。要求香港要大力發展創科產業，提升旅遊行業，主動舉辦國際交流活動，邀請更多外國友人實地考察香港，感受香港活力。

自稱「由治及興」嘅港府，近排面對經濟發展同疫後復甦顯得無力。香港疫情後曾推「夜經濟」、「熊貓經濟」，但經濟未見起色。《I》