美國2024年總統大選確定由共和黨候選人、前總統特朗普（Donald Trump）當選，佢將再度入主白宮。對此，克里姆林宮昨（6日）表示，美俄關係正處於歷史低點，美國對俄羅斯嚟講仍然係一個「不友好國家」，所以俄羅斯總統普京（Vladmir Putin）無計劃向特朗普道賀。至於俄國無上限嘅嘅盟友中國，就已經向特朗普表達祝賀。

經過激烈嘅選戰，特朗普最終成功逆襲，擊敗民主黨嘅候選人賀錦麗（Kamala Harris），再次入主白宮。佢選前提出嘅外交政策會唔會逐步落實，成為全球關注嘅焦點。對於俄烏戰爭，特朗普揚言「一日內解決」，佢同副手范斯（JD Vance）之前都多次質疑美國對基輔嘅承諾，暗示勝選後可能會對烏克蘭施壓，迫使達成休戰協議。

克里姆林宮發言人佩斯科夫（Dmitry Peskov）回應指，由於美國間接參與俄烏戰爭，同時為烏克蘭提供軍援，令美俄關係跌至冰點。佢話，雖然普京喺特朗普首個總統任期內曾試圖向佢示好，雙方亦一度互相稱為朋友，但而家無計劃向佢祝賀。佢補充話，美國畢竟係一個不友好嘅國家，無論直接定係間接，都已經深度捲入針對俄羅斯嘅戰爭。

針對特朗普聲稱上任後將快速解決俄烏戰爭，佩斯科夫指出美國確實有能力影響呢場衝突，佢提到雖然呢啲唔會一夜之間發生，但美國可以調整其外交政策路線，幫助結束衝突。佩斯科夫強調，唯有時間先能驗證特朗普係咪真係能夠兌現呢個承諾，佢亦表示無論如何俄羅斯都願意同美國對話，並呼籲特朗普上任後唔好再讓美俄關係惡化落去。

雖然俄羅斯官媒早前對特朗普當選表現出支持，但部分俄羅斯官員則強調，邊個成為美國總統對莫斯科嚟講無關痛癢，因為美國兩黨本質上都係反俄，無論係民主黨定係共和黨，都希望壓制俄羅斯。

另一邊廂，中國國家主席習近平於週三致電特朗普，向佢表示祝賀。中國外交部喺6號晚亦透過未署名發言人嘅答記者問形式，回應特朗普當選美國總統，並向佢表示祝賀。

當日嘅中國外交部例行記者會上，有記者提問到特朗普即將重返白宮，發言人毛寧表示，美國總統選舉係屬於美國內政，中方會尊重美國人民作出嘅選擇。對於特朗普揚言將會上調對中國嘅關稅，毛寧以「不回答假設性問題」回應，未有進一步評論。

美媒CNN報導提到，隨住美國官員努力評估習近平係咪對台灣有近期計劃，特朗普上月曾指出，削減對華關稅加上展現強硬姿態，可能係阻止中國對台動武嘅關鍵。報導仲引述特朗普10月接受《華爾街日報》訪問嘅言論，當被問到會唔會動用軍事保護台灣時，特朗普話，如果中國敢進犯台灣，佢會向其徵收高達150%至200%嘅稅。當記者追問佢會唔會動用武力應對台灣封鎖，特朗普笑住講佢唔使咁做，因為習近平「尊重我，佢知我係個瘋子」。《I》