網媒《AM730》報道，政府積極推動生育，立法會議員亦各出奇招。工聯會嘅鄧家彪提議喺政府辦公室貼多啲「BB相」，話要令市民覺得小朋友好可愛，甚至形容BB係「Mini me」，「係個細細個嘅鄧家彪」。佢笑言大家睇到BB相會感到開心，自然就唔想加班，趕返屋企陪伴家人。

立法會嘅人口政策小組昨（4日）討論生育議題，鄧家彪憶述當年大學流行嘅「四仔主義」，即係畢業後追求「屋仔、老婆/老公仔、人仔、車仔」。但佢認為，現時部分年輕人就算有經濟能力都未必願意生仔，原因可能係「唔敢生」或「唔想生」。佢覺得要由公務員帶頭營造親子氛圍，因為佢哋收入穩定，冇理由唔可以建立家庭。鄧家彪建議，喺政府部門貼多啲「BB相」，希望引起市民對生育嘅興趣，從而改變社會氣氛。

對於鄧家彪嘅提議，勞工及福利局副局長何啟明形容「好有創意」，仲話佢自己都貼咗BB相，但佢笑言並非人人都有「材料」，表示會同公務員事務局研究下搵唔搵到多啲「BB相」嚟擺。

新民黨立法會議員容海恩，作為兩個女仔嘅媽媽，透露自己曾問女兒將來會唔會想有小朋友，點知兩個女仔都話「唔想」，因為「唔識湊BB」。容海恩感到有啲失落，認為學校應該教育小朋友湊小朋友係一件開心事，而唔係成日見到勞累嘅家長喺屋企發脾氣。

何啟明則認為，「如果問小朋友想唔想生仔，佢哋可能未必識答」。佢建議容海恩應該換個問法，例如問小朋友想唔想多個弟妹，咁樣可能會更貼近佢哋嘅心聲，小朋友應該會回應「好想」。《I》