烏俄戰爭已持續超過 2 年，為幫助俄羅斯盡快取勝，北韓派兵幫助俄羅斯作戰。不過，幫手嘅北韓兵唔單止冇被善待，反而仲畀俄軍虐待同歧視，甚至遭到無差別攻擊，淪為名符其實嘅炮灰。

根據《大紀元新聞網》今（5日）報道，北韓兵首度喺庫爾斯克同烏軍交鋒就慘敗，差唔多四十名北韓兵中，最後只有一人倖存，但呢位倖存者仲要成為烏軍俘虜。專家分析指，北韓兵死傷咁多，根本同俄軍自己有關。

立陶宛非政府組織BlueYellow代表阿曼表示，當時俄軍砲兵誤判咗位置，將北韓兵當敵軍誤炸，導致大量傷亡。佢指，正常情況下，戰場上各方嘅砲兵都會避免「打自己友」，但俄軍竟然喺北韓兵衝鋒時繼續開火，反映出北韓兵只係俄軍眼中隨時可以犧牲嘅砲灰。

《大紀元》專家金然指出，俄軍將北韓兵擺喺前線當「先鋒」，為嘅就係保住自己兵力，減少俄軍士兵嘅犧牲。每當北韓兵近距離激起烏軍火力，俄軍就冷血地進行無差別炮轟，根本無視北韓兵嘅生死。

相比之下，中國僱傭兵嘅待遇雖然比北韓兵好啲，但依然受到俄軍歧視。烏克蘭國防部情報總局公佈咗一段俄軍通訊音頻，當中俄軍用貶稱「該死嘅中國人」嚟形容即將到埗嘅北韓兵，顯示歧視態度。

X帳號「Daniel Fang」爆料，話好多中國僱傭兵喺盧干茨克前線被當成「砲灰」，命運相當悲慘。

南韓國防部消息指出，截至本地時間5日，已經有超過一萬名北韓兵入咗俄羅斯，當中一大部分已經被派往俄羅斯西部嘅庫斯克前線。據南韓KBS報道，烏克蘭國防部長烏梅洛夫接受訪問時透露，烏軍已經同北韓兵發生咗首次小規模交戰，並確認北韓已正式介入俄烏戰爭。

目前戰情明顯對烏克蘭不利，據《經濟學人》分析雖然烏軍喺東頓巴斯波克羅夫斯克成功阻擋住俄軍攻勢，令普京顏面無光，但喺其他戰線上俄軍正逐步推進。

喺北部嘅庫皮安斯克，俄軍成功喺奧斯基爾河切割烏軍陣型；東部嘅恰西夫雅爾，俄軍終於越過北頓涅茨運河；而南部烏格列達爾附近，俄軍奪取咗周邊高地，從兩個方向包抄庫拉霍沃市。庫爾斯克地區烏克蘭年初奪回嘅部分領地，如今又被俄軍奪回咗一半，形勢愈發險峻。

問題唔單止係失去領土。雖然烏克蘭而家失去嘅土地有限，但更大嘅問題係，烏軍嘅人數同質素正逐步被削弱。烏軍人手唔夠，兵力分散，加上大量傷亡，令前線士兵愈打愈攰，幾乎去到崩潰嘅邊緣。

10月21日，美國國防部部長奧斯丁訪問基輔，公開表示，經過970日戰爭，普京至今未達成任何一項戰略目標。奧斯丁表現得非常自信，向外界明確表態，直言莫斯科永遠都唔會喺烏克蘭取得勝利。

不過，鏡頭背後，奧斯丁同五角大廈嘅同僚、西方嘅官員，甚至好多烏克蘭指揮官，其實對戰爭走勢愈來愈擔心，尤其係對烏克蘭未來六個月能否頂得住俄軍進攻感到憂慮。《I》