台灣《新頭殼》報導，以色列軍方近嚟大規模打擊黎巴嫩真主黨嘅作戰資源，成效顯著。以軍近日表示，真主黨火箭庫存已經被削弱至僅剩 20%，無人機更係損失咗 70%，仲有多達 8 個無人機同火箭生產基地被摧毀。除此之外，以軍更宣佈成功殲滅真主黨高層指揮官穆日姆，此人曾接受過中國培訓，生前以中國為傲，並希望日後可以被派駐中國出任大使。

社交平台 X 上「以色列戰爭」帳號今日更發佈影片，展示以軍炸毀真主黨地道嘅瞬間，引爆過程強烈震撼，爆炸塵埃瞬間籠罩畫面，大大顯示爆炸威力。

不過真主黨並無完全被壓制，依然持續攻擊以色列。最近喺以色列北部邊境，一次真主黨火箭襲擊造成 5 名外籍勞工死傷，當中 4 死 1 傷。另外，真主黨人員更進入黎巴嫩嘅 Qlayaa 基督社區，試圖利用汽車發射火箭攻擊以色列，但隨即遭到當地居民反擊。據悉，真主黨成員點火發射後即被憤怒民眾當場打死，而車內另 2 名成員則被燒死。

以色列同真主黨之間嘅激烈衝突或即將出現轉變。美國據報已經同意以色列提出嘅停火計劃，當中包括以色列全面掌控黎巴嫩邊境 10 公里嘅緩衝區，保障邊界安全。此外，與以色列長期對立嘅伊朗態度亦有變化。伊朗最高領袖哈米尼喺早前以色列轟炸伊朗後曾表示報復已到此為止，但近日再次改口稱必須報復。

自哈馬斯舊年 10 月突襲以色列後，真主黨即刻從黎巴嫩展開連串火箭攻擊，以色列隨即發動報復行動，持續至今已超過一年。據黎巴嫩官方數據，相關衝突至今已造成 2,100 多人死亡，真主黨多位高層領導亦被殺，組織嘅基礎設施同飛彈武器庫亦遭受重大損失。

根據《國民報》獲得嘅文件顯示，雙方正就一項 60 天停火協議進行討論。文件指出，以色列將喺未來 7 日內分階段從黎巴嫩南部撤軍，同時黎巴嫩政府會增派 10,000 名軍人駐守南部邊界，並指示安保部隊嚴格把控武器及相關物資嘅入境。

文件進一步指明，美國將協助黎巴嫩增加部署水平，同時提升軍事能力。黎巴嫩軍隊亦需監控同管制武器相關設施，並拆除所有不符規定嘅設施同武器庫，以加強邊境安全。

為確保協議有效執行，美國將主導建立一個獨立嘅監察機制，成員包括經黎巴嫩同以色列同意嘅地區國家代表。文件指出，該機制將由美國中央司令部高級官員同國家安全官員領導，監控雙方承諾。

協議中清楚寫明，以色列保留自衛權，特別係對任何迫在眉睫嘅安全威脅，包括重型武器、彈道飛彈等武器裝備。協議甚至賦予以色列於情報收集同監察目的下有限度侵犯黎巴嫩領空嘅權利，但要求唔會達到肉眼可見嘅程度。

早喺2006年聯合國通過第1701號決議，規定黎巴嫩南部地區應由黎巴嫩軍隊同聯合國維和部隊駐守，避免真主黨維持軍事存在。不過，多年嚟該決議未能落實，以色列與黎巴嫩之間亦持續存在衝突。知情人士指，協議成行嘅關鍵在於以色列嘅態度，但任何超出聯合國1701號決議嘅安排，黎巴嫩政府未必會接受。《I》