《自由亞洲電台》報道，美國財政部周三（30日）再度公布新一批制裁名單，涵蓋275間公司同個人，當中包括香港、中國內地、土耳其同印度等多個地區和國家。值得留意係，今次被列名嘅香港公司數量高達28間，比八月時嘅24間還多，創下新高；中國公司則有11間上榜。

美國財政部指控呢啲公司參與支持俄羅斯軍工業，協助採購美國及其他國家製造嘅電子元件、集成電路、無人機零件同晶片製造機械等高科技設備。據指，呢啲物資幫助俄羅斯逃避西方制裁，持續對烏克蘭發動攻擊。

今次被點名嘅香港公司Sinno Electronics成為焦點，其兩名高層Becky, Lin Qing同Betty, Peng Minbo都被列入制裁名單。Sinno Electronics係香港註冊公司，喺香港同中國內地有多個營運地點。美國財政部指，該公司長期向俄羅斯防衛機構供應微電子產品，協助俄方獲取核心科技。

資料顯示，Becky, Lin Qing係Sinno Electronics嘅常務董事，亦係香港註冊嘅Sinno Group Limited（簡稱Sinno Group）嘅唯一股東。Sinno Group自2010年起持續向俄羅斯提供電子設備，並自2015年起喺俄羅斯設立辦事處。到2024年4月，Sinno Group仲積極參加俄羅斯最大規模嘅電子展覽，並向俄方提供過數百次列為CHPL一級產品嘅高端微電子貨運。

即使Sinno Electronics已經被列入美國「實體清單」，Becky, Lin Qing依然同美國點名嘅俄羅斯企業領導保持互動。而Betty, Peng Minbo作為Sinno Electronics嘅另一高層，亦深度參與俄羅斯電子市場，自烏克蘭全面戰爭爆發以來，向俄方發運咗數千次外國來源嘅微電子產品，其中包括生產俄羅斯先進精密制導武器嘅關鍵物料。Betty更直接同多間美國點名制裁嘅俄方企業合作，供應用於先進俄羅斯武器系統嘅電子元件。

財政部亦透過Sinno Electronics交易紀錄搵出多間香港公司，指控佢哋參與運送同採購工作，成為協助俄羅斯軍事行動嘅一部分。《I》