據韓聯社、朝鮮日報等媒體報道，一名曾經喺中國半導體公司工作嘅韓國國民，因涉嫌向韓國洩漏公司機密而被捕，成為首宗韓國人因違反中國「反間諜法」而被拘捕嘅案例。

呢名韓國人係三星電子晶片部門出身，2016年起喺中國3至4間大晶片企業工作，包括中國最大嘅記憶體企業長鑫儲存（CXMT）。合肥市國家安全局懷疑佢喺長鑫儲存工作期間，向韓國洩露咗有關晶片嘅技術資料。不過，呢名韓國人堅稱，自己根本無接觸到中國晶片核心技術嘅權限，唔可能洩露任何機密。

根據韓國KBS電視台嘅報導，該名韓國人與妻子同兩名女兒定居喺中國安徽省合肥市。去年12月嘅某個清晨，佢著住睡衣仲未起身，就俾中國公安突然上門帶走。佢嘅女兒表示，當局當時無明確告知罪名，佢被隔離喺酒店長達五個月，禁止同家人聯絡，完全無法了解調查進展。直到今年5月，佢先正式移交檢方關押，現時關押喺合肥拘留所。家屬透露，佢患有糖尿病，但喺拘留所未能得到所需藥物，健康狀況堪憂。

韓國駐中國大使館表示，自1月得知事件後，已經全力提供領事協助，爭取保障當事人嘅合法權利。中國外交部發言人林劍喺例行記者會上表示，呢名韓國公民因涉嫌違反間諜法而被中國逮捕，相關內容已通知韓國駐中大使館。林劍強調中國係法治國家，依法處理犯罪，同時會保障當事人嘅合法權益。

自2014年中國制定「反間諜法」至今，呢次係首次有韓國人因涉嫌違反該法而被捕嘅案例。隨住中國近年修訂咗「反間諜法」，擴大咗間諜行為嘅定義，將「竊取國家機密和情報」改為「提供涉及國家安全和利益的文件」，令間諜罪嘅邊界更加模糊化。如果呢名韓國人最終被判刑，佢將成為第一個因反間諜法而受罰嘅韓國人。

自從中國新《反間諜法》公布之後，外界就對其可能帶嚟嘅影響表示擔憂。中國歐盟商會主席伍德克直言，有需要清楚界定咩信息屬於敏感，咩唔屬敏感。瑞士《新蘇黎世報》更加指出，喺新法之下，未來中國嘅政界人士、學者同記者可能因擔心新規定嘅後果，會減少甚至避免同外國同行聯絡。

台灣海峽交流基金會台商財經法律顧問蕭新永，提醒台商企業要特別謹慎處理個人或單位嘅資料，因為一旦有某啲資料被視為涉及國家安全或利益，隨時會被定性為「間諜行為」，後果不堪設想。

根據國家安全部微信公眾號統計，自從新《反間諜法》開始實施以來，國安部門已經公開咗至少30宗涉嫌違反間諜法嘅案例，涉及嘅目標包括諮詢公司、學術機構、在校學生同媒體記者等多個行業。

2024年4月，國安部門更加發布咗一份「十大公民舉報案例」詳情，例舉咗多宗涉及境外機構、商業公司同中國公民喺外地被威脅收買嘅案件。同時，國安部門舉辦咗2023至2024年度嘅公民舉報表彰大會，共有86名市民受到表揚，其中15人獲得「重大貢獻獎勵」，另外71人則獲得「重要貢獻獎勵」。

按照2022年公布實施嘅《公民舉報危害國家安全行為獎勵辦法》，「重大貢獻獎勵」嘅金額為人民幣3萬至10萬元，而「重要貢獻獎勵」則為人民幣1萬至3萬元。《I》