《自由亞洲電台》報道，香港疑成中國軍事新拓展基地，至少四間大學同中國航天軍工企業建立緊密合作，甚至帶有軍事化發展嘅趨勢，港府亦不遺餘力，投入過百億公帑支持相關項目，惟對具體投資金額隻字不提。

早喺9月24日，香港中文大學就攜手內地企業發射低軌衛星「香港青年科創號」，喺山東海陽嘅「東方航天港」成功發射入軌。據稱，呢顆衛星係全球首顆AI大數據模型監測衛星，用途包括監測香港同大灣區嘅環境及地理資訊，仲有防災同促進低空經濟發展等用途。

美國詹姆斯敦基金會副研究員張崑陽指出，呢粒衛星嘅用途並唔簡單，可以即時監察人同車，具備亞米級精準度，隨時可以改裝成軍用，進行高效數據分析及目標追蹤。

事實上，所謂「軍民融合」嘅概念，正係國家主席習近平上台以來大力推動嘅一項國策，早喺2015年就提出打破軍民界限，促進軍事同民用資源共享。呢種融合模式更推動航天、晶片同AI等領域嘅高科技發展，而「華為」則係當中嘅典型例子。呢啲高科技同時兼具民用同軍事用途，足以應對西方制裁。

資料顯示，中大早喺2005年就成立咗「太空與地球信息科學研究所」，成為中國科技部「國家遙感中心」嘅香港基地，雖然近年先顯得活躍。去年11月，該研究所與中國國家航天局嘅對地觀測同數據中心簽咗合作備忘錄，內容涉及衛星星座建設及數據交換。

中大並唔係唯一參與「軍民融合」嘅學府。香港理工大學亦積極投入國家航天任務，今年6月佢哋與「中國空間技術研究院」合作，為「嫦娥六號」研製咗「表取採樣執行裝置」，更喺月球背面成功完成首次採樣創舉。

而喺7月，理大亦與「國星宇航」簽訂合作協議，表明共同推動科研力量服務國家發展。理大副校長趙汝恒仲話，理大有超過30年航天科研經驗，係香港唯一多次參與國家航天計劃嘅大學。「中國空間技術研究院」隸屬中國軍工央企「航天科技集團」，2022年被美國以竊取高科技為由制裁。

另外，香港科技大學去年亦同內地「長光衛星技術有限公司」合作，成功發射「雄彬一號」地球觀測衛星。「長光衛星」係軍民融合重點企業，負責開發「吉林一號」遙感衛星，近年因支持俄羅斯軍事活動被歐盟制裁。而香港大學嘅太空研究實驗室早喺2020年就已經同中國航天集團多間公司合作，研製並發射咗「龍蝦眼X射線探測衛星」。

值得留意嘅係，上述有關大學都有「遙感」衛星相關項目，而西方國家一直將中國嘅「遙感」系列衛星稱作中國軍用偵察衛星。

自從2022年之後，港府加強投資中國創科成為新政策重點，創新科技基金至少投入2000億港元，但具體帳目未有公開，尤其係各項航天科技計劃嘅投入資金成謎。《I》