伊朗日前對以色列發動襲擊，報復伊朗革命衛隊指揮官同德黑蘭支持嘅武裝組織領袖被殺。以色列喺昨日做出回應，出動空軍針對伊朗嘅軍事設施進行空襲，並嚴正警告伊朗唔好反擊。

據台媒《新頭殼》報道，以色列派出超過100架戰機，其中包括F-35隱形戰機，全面空襲伊朗多個戰略目標，直擊伊朗革命衛隊基地同導彈生產設施，甚至連剩低嘅四套S-300防空系統都摧毀晒，令伊朗防空能力大受打擊。

據X帳號「NEXTA」今日透露，以軍今次攻擊行動針對咗伊朗約20個主要目標，目標包括防空系統同飛彈生產廠房。伊朗官方低調回應，聲稱以軍襲擊帶來嘅損害輕微，現階段無意反擊。

另一個X帳號「以色列戰爭」指出，伊朗失去最後四套S-300防空系統後，反擊可能性進一步降低，而以軍亦趁勢炸毀咗真主黨一個火箭火藥倉庫。網上亦流出大量影片，顯示伊朗多地發生猛烈爆炸，夜空被火光照亮，現場冒出巨型黑煙，畫面震撼。

「以色列戰爭」同X帳號「NiKITa」相繼分享伊朗被襲擊嘅片段，片中可以見到爆炸引發嘅濃煙壟罩半個天空，顯示今次襲擊規模相當驚人。

有評論指，以軍今次行動之所以如此精準，係因為由參謀長哈爾維親自坐鎮指揮。以色列國防部亦公開咗哈爾維喺國防部地堡指揮中心領軍嘅照片，畫面中佢神情嚴肅，身邊一眾軍官亦齊心協力計劃今次行動。X帳號「OFFICIAL NEWS」更分享哈爾維同佢軍官團隊討論戰術嘅影片，見到佢哋有條不紊咁策劃著下一步行動，展現出強大自信。

對於以色列嘅行動，伊朗總統佩澤希齊揚表示，伊朗無意對以色列開戰，但警告準備好應對以色列嘅攻擊。佢強調伊朗會為保衛自己嘅國家同民族權利，對所謂「猶太復國主義政權」嘅侵略作出適當回應。聯合國安理會亦將於明日舉行緊急會議，商討今次危機。

法新社報道，佩澤希齊揚喺內閣會議上指出，伊朗唔會主動發起戰爭，但亦唔會坐視不理，強調若以色列嘅「蠻橫行徑」繼續，區域局勢隨時惡化，仲指美國無履行承諾，聲稱伊朗克制就會結束衝突，卻無兌現。

路透社透露，聯合國安理會輪值主席國瑞士今日表明，會應伊朗嘅要求召開緊急會議，獲阿爾及利亞、中國同俄羅斯支持，將就以色列嘅空襲行為進行討論。

伊朗外交部長阿拉奇向安理會15個成員國發函，批評以色列嘅行動已經對國際和平構成嚴重威脅，加劇區域不穩。阿拉奇強調，伊朗保留根據聯合國憲章及國際法嘅權利，喺適當時機對以色列嘅攻擊進行回應，並視為合法自衞。《I》