最近，內地「蹲地文化」再度引發中港矛盾，兩名香港網紅近日喺尖沙咀星光大道拍片，疑似取笑來港遊客鍾意蹲喺地上，嘲諷佢哋「係咪腰骨有問題」，仲推住輪椅以普通話去問幾個蹲喺地上嘅內地遊客：：「我看你蹲了好久，是不是腰骨有問題，要不要坐輪椅？」呢條片喺內地瘋傳，連廣東電視台「珠江之聲」都喺抖音轉載，引起內地網民強烈不滿，批評兩位網紅為咗博取流量，歧視同侮辱內地人。

影片開場嘲諷蹲地遊客

影片開頭，兩名網紅男女用廣東話講：「唔知點解好多遊客嚟到香港都好鍾意踎低，到底佢哋嘅腰骨係咪有問題呢？身為熱心嘅香港人，我哋嚟關心下佢哋啦。」然後，佢哋用帶有粵式口音嘅普通話，逐一向幾名蹲喺地上嘅內地遊客發問。

其中一個女子推住輪椅，走到K11 MUSEA附近嘅一名男子面前，用普通話問佢：「蹲了很久，腰骨是不是有問題」嗰位男子拒絕咗佢哋嘅好意，然後拎起放喺地上嘅背囊同購物袋就走人。

影片中，呢對網紅亦向其他蹲喺海旁嘅內地遊客發問，同樣用普通話問「你好你好，你們沒事吧，我看你蹲了很久」對方答：「沒事，站累了」講完就站起身走人。之後，佢哋仲向其他遊客重複呢種問法，但都被拒絕。最後，男子喺片尾用廣東話講：「原來大家嘅腰骨都冇問題嘅，咁就唔好周街踎啦，快啲搵個位坐啦。」

內地網民轟搞中港矛盾

呢條影片喺內地迅速引發巨大反響，廣東電視台「珠江之聲」喺抖音轉載後，內地網民喺微博發表大量批評言論。唔少人覺得兩名網紅嘅行為係歧視內地人，留言話：「蹲着也犯法？」、「不知所謂，又搞中港矛盾」、「真的不懷好意，怎麼不去問外國人呢」、「說明香港公共設施缺乏，街道椅子都沒有」、「放心，以後沒人去了」。

亦有內地網民指：「一到周末天橋路邊都是菲傭席地而坐，他們倒是不會上去問人家是不是影響市容」、「直接坐上去，看看他們會怎麽樣？」、「你這兩個港燦何來優越感」、、「菲傭不是到處席地而坐？」、「香港人怎麼看待他們的做法呢？」、「是我我就坐了。」 、「香港真的沒有甚麼坐的地方，每天走到累得半死。去商場，一層就兩張長椅，且都被人佔着。」、 「當然要啊，這輪椅最好送我當然要啊這輪椅最好送我」、 「蹲着有甚麽問題？」等等。