今學年起，8間資助大學招收非本地生上限將翻倍至佔核准學額嘅40%。與此同時內地學生使用虛假學歷入讀本港大學嘅醜聞就愈揭愈多。對此，特首李家超表示，會同內地單位共同打擊有關違法行為。

早前一名24歲內地女子假冒美國康奈爾大學學生，向香港大學申請金融碩士課程，企圖以虛假學歷獲取入境證。案件於東區裁判法院審理，被告承認作出虛假陳述，企圖騙取入境證，最終被判囚17周。裁判官曾宗堯判刑時斥責被告妄想瞞天過海，強調以假亂真係不可接受嘅行為。不過，由於被告自6月22日起已經還柙，法庭裁定可以即時釋放，並將其遣返內地。

香港中文大學日前亦公布，自5月以來校方已經全面翻查過去5年所有非本地生嘅申請個案，並發現一宗懷疑虛假學歷嘅個案。而喺今年度嘅招生過程中，校方已經成功堵截10宗懷疑造假嘅申請，當中涉案人士主要來自兩個國家，並未曾入境香港。中大已即時通報警方展開調查。

中大學生資助處處長王家徹透露，有「黑中介」以保證入讀中大為名，向學生索取巨額金錢作為「保證」。呢啲中介仲假冒中大，向申請人發出偽造嘅入學通知書，有學生曾經持假通知書到中大報到，才揭發整件事。王家徹形容，呢啲假通知書「真得嚇人」，難以分辨真假。為應對呢啲造假行為，校方已經採取一系列對策，但不便公開具體措施。

王家徹澄清，中大從來冇同任何中介合作招生，「我哋以前冇，今日冇，將來都唔會有。」佢呼籲所有有意報讀中大嘅學生同家長，應該直接聯絡校方嘅入學處，避免被騙。

《香港01》14日報道，香港有公司聲稱可以提供造假學歷服務，甚至誇口中國內地嘅國際試場可以「配合」，只要花190萬人民幣，就能保證入讀港大。

涉事中介公司聲稱可以透過「買通」海外學校及考場，協助內地學生取得虛假學歷，進而申請本地頂尖大學，更宣稱提供從背景到考試全套「服務」，聲稱「所有證書都是真金白銀買來」，讓大學即便查核亦無從察覺。有消息指，曾有內地學生花費過百萬元，透過涉事中介公司，取得英國國際高中水平證書考試（iAL）接近滿分嘅成續，入讀本港一間頂尖大學。

除咗「保送」，如果學生需要考英文水平測試如TOEFL，佢哋都可以提供作弊服務。呢項服務價格為兩萬人民幣，考試時只需學生同公司共享螢幕，便可獲得答案，甚至口語部分都會提前準備好畀學生照讀。

特首李家超今（22日）喺出席行政會議前，就將最近爆出嘅假學歷風波，歸咎於中介為賺錢不擇手段。佢強調，使用假文書嘅行為係違法，政府會嚴正打擊，並會同境外相關部門合作，杜絕呢類違法行為。《I》