《香港01》今（14日）報道，香港有公司聲稱可以提供造假學歷服務，甚至誇口中國內地嘅國際試場可以「配合」，只要花190萬人民幣，就能保證入讀港大。

涉事中介公司聲稱可以透過「買通」海外學校及考場，協助內地學生取得虛假學歷，進而申請本地頂尖大學，更宣稱提供從背景到考試全套「服務」，聲稱「所有證書都是真金白銀買來」，讓大學即便查核亦無從察覺。

涉事中介公司曝光 董事曾與名人合影

《香港01》發現，本港一間名為「中港升學中心」嘅留學中介，疑為內地學生造假學歷。有消息指，曾有內地學生花費過百萬元，透過涉事中介公司，取得英國國際高中水平證書考試（iAL）接近滿分嘅成續，入讀本港一間頂尖大學。

該公司唯一董事兼股東為陳景華。根據公司宣傳單張，陳景華自稱曾任職於多間大學，甚至係教育局「青年與教育部門主管」，並喺宣傳中晒出同中外政要嘅合影，包括同前外長李肇星、法國總統馬克龍嘅合照，試圖增強可信度。

《香港01》查證，教育局否認有「青年與教育部門」，而理大同嶺大亦表示同陳景華無任何關係，港大則未回應。該公司宣稱嘅「精英團隊」多為虛構，其中包括香港大學專業進修學院總監司徒志文，佢明確表示身份遭盜用，同中介無關。

高價「保送」港大 高考不過照樣入學

《香港01》記者以內地學生家長身份接觸中介公司，該公司位於觀塘辦公室嘅「程老師」接待並推介一個名為「保送」嘅方案。程老師表示，針對無法通過高考入讀香港八大嘅學生，他們可以幫助「換背景」，即將學生嘅內地高考成績轉為國際學校背景，並安排參加國際考試。

更令人震驚嘅係，程老師透露，內地考場會「配合」考生，只要人到場，無需擔心考試成績：「不用擔心萬一考不過，這個不存在的。重要是人要去，因為它（試場）有「刷臉」（人面識別）的紀錄。」

佢強調，所有成績都係真實，且大學查證無法發現問題。至於考試是哪一個國際試、在哪裏考，她拒絕透露具體信息，聲稱怕被同行抄襲。

程老師仲介紹咗各大學嘅「入場費」。想入讀城大或者理大，需支付至少150萬人民幣；而港大、中大同科大則高達190萬人民幣。佢聲稱，收費昂貴係因為「我們不做假，所有證書都真實可查」。

除咗「保送」，程老師亦提到，如果學生需要考英文水平測試如TOEFL，佢哋都可以提供作弊服務。呢項服務價格為兩萬人民幣，考試時只需學生同公司共享螢幕，便可獲得答案，甚至口語部分都會提前準備好畀學生照讀。

涉事中介封門不認 資訊虛實難辨

隨住大學招生季節臨近，程老師透露，不少來自內地嘅家長已經前嚟查詢「保送」方案，當日亦有來自深圳、廣州、佛山嘅客戶上門。然而，當《香港01》記者再次以真實身份到訪中介辦公室時，程老師否認早前所有造假學歷嘅說法，並聲稱公司只提供正當培訓服務。

佢解釋，所謂考場「配合」並非作弊，而係誇大咗自己嘅實力，目的係「為了做生意」，但強調自己了解香港法律，唔會觸犯紅線。然而，當《香港01》記者深入追問時，程老師開始閃爍其詞，最終以拒絕採訪為由結束對話。

同日，涉事中介公司網站即時關閉，記者同公司嘅微信聯繫亦被封鎖。至於陳景華，佢嘅微信賬戶亦喺當日改名，至今無回應《香港01》記者嘅任何查詢。《I》