北京當局近年投入鉅資大力發展電動車，將其視為「彎道超車」、「超英趕美」嘅重大國策。不過，中國製電動車爆炸、自燃等案例一直時有發生。深圳規定下月11日起，電動車喺地下停車場嘅充電裝置，不可設在地底四層或以下。此案例顯示，即便中國電動車發展迅速，但就連自己國內都對其安全性充滿疑慮。

據《Now新聞》今（14日）報道，廣州一間商場嘅地底停車場外，出現咗一塊引起爭議嘅告示牌，明確指出新能源汽車唔可以駛入地底停車場，只有燃油車可以入內。喺入口處，保安人員會指揮新能源汽車車主，要求佢哋繞道去另一邊停車。有唔少車主覺得呢個安排非常唔方便。

一位車主表示，自己花咗好多時間搵車位，仲要繞嚟繞去，搞到好麻煩。佢直言，希望可以放寬呢啲限制，方便車主停車。另一位車主更覺得呢個措施係歧視，指明唔畀佢哋入去已經係一種不公平對待。

喺呢個地底停車場，可以見到停放嘅車清一色都係藍色車牌嘅燃油車，至於綠色車牌嘅電動車就只能夠泊喺地面位置。其實呢個情況唔只發生喺商場，廣東省博物館喺上個月亦發出公告，表示由於地下停車場同文物庫房同埋公共區域喺同一棟建築內，如果發生火災，會有波及文物同人身安全嘅風險，所以下令新能源汽車只能夠停泊喺露天嘅停車場。

深圳最近亦推出咗全國首個有關新能源汽車停放喺地下停車場嘅標準。呢個新規定將喺下個月11號開始實施，規定地下停車場內嘅充電設施唔可以設置喺地底四層或以下嘅位置。

根據中國國家消防救援局嘅統計，2023年全中國共接獲2.1萬宗電動車火災報案，比起2022年上升咗17.4%。而2022年全國共接獲1.8萬宗電動車火災報案，較2021年大幅增加咗23.4%。據北京市最新數據顯示，自2024年1月以嚟，北京市已經發生咗33宗電動自行車同電動三輪車火災事故。從火災原因嚟睇，30宗係由電池故障引起，佔總數嘅91%。

廣州市博士科技創新研究會會長彭澎指出，大家可能擔心新能源汽車容易起火甚至爆炸，隨住地下停車場越嚟越多，供需矛盾只會更加嚴重，大量新能源汽車停喺邊度係一個大問題，係咪要專門建設多啲露天停車場畀呢啲車呢？咁地下停車場又會唔會因為呢啲限制而變得空置呢？

彭澎建議，汽車廠商應該加強研究，提升新能源汽車電池嘅安全性，亦建議停車場增設更多消防裝置，配合新能源汽車嘅發展，確保安全同便利兼顧。《I》