美國前總統特朗普再度面臨刺殺威脅。昨（13日）警方喺特朗普加州競選活動拘捕咗一名攜帶已上膛槍械嘅男子，當時呢名男子企圖混入活動會場，佢自稱係特朗普嘅支持者。

根據加州警方消息，呢名男子喺特朗普活動開始前，喺入場檢查站被拘捕，佢身上帶住一支上膛嘅霰彈槍、一支手槍，仲有多個大容量彈匣。佢持有假記者證同貴賓通行證，企圖以虛假身份混入活動會場。警方指，呢名男子係來自拉斯維加斯嘅居民，名叫米勒（Vem Miller）。

加州河濱郡（Riverside County）警長畢昂柯（Chad Bianco）表示，米勒有計劃刺殺特朗普，並直言：「我哋應該係成功阻止咗一次刺殺圖謀。」根據警方描述，米勒所持嘅識別證同其他人嘅證件有顯著分別，令警方即刻起疑，並對佢展開搜查。

警方進一步指，米勒可能係一個右翼反政府組織嘅成員，紀錄顯示，警方控告米勒非法持有上膛槍械後，佢交咗5,000美元（約3.9萬港元）保釋金獲得保釋。警方強調，事件未對特朗普同佢嘅競選活動造成威脅。

米勒擁有加州大學洛杉磯分校（UCLA）碩士學位，仲曾喺2022年競選內華達州州議員。警方透露，米勒自稱係「主權公民」（sovereign citizen），佢哋呢類人相信自己唔受政府法規限制，除非佢哋願意接受。

警方懷疑，米勒喺周日出現喺特朗普競選活動係計劃刺殺。雖然目前未有定論，但警方已發現佢身上有多本唔同姓名嘅假護照，仲有已上膛嘅槍械，甚至駕駛住一架未登記嘅車，車牌亦係假嘅。

美國特勤局對加州警方嘅行動表示讚揚，指呢次事件並未影響當局嘅保安工作，並向所有協助維持安全嘅執法人員致敬。加州司法部表示，事件並未涉及任何聯邦罪行，案件仍喺調查當中。

米勒事後接受美國媒體訪問時，強調自己係「侵粉」，明言對自己被捕感到驚訝。佢解釋自己攜槍純粹係為咗保護自己安全，又話喺檢查站已經主動向警察通報自己攜有槍械，並將槍械擺喺車尾箱。佢表示自己遭扣押8小時後獲釋。佢自稱係藝術家，唔會對任何人使用暴力，形容呢啲指控係「一派胡言」。根據當地警方消息，米勒應於2025年1月2日喺當地法院出庭。

畢昂柯警長表示，聯邦調查局（FBI）亦訊問另一名男子，因為警方嘅炸彈嗅探犬反覆對佢作出警示，認為佢可能係危險人物。該名男子最後未被批准進入特朗普造勢會場。

特朗普喺過去嘅幾個月多次面臨暗殺威脅。今年7月，佢喺賓夕法尼亞州嘅一場競選活動上，曾遭人開槍射中耳朵。到咗9月，喺佛羅里達州嘅高爾夫球場外，亦有一人被捕，當時相信該人亦圖謀刺殺特朗普。《I》