昨（13日）澳門特首選舉唯一候選人岑浩輝，以得票率98.99%當選，成為澳門回歸後首位喺中國內地出世嘅特首，正式開啟「京人治澳」新時代。佢當選後表示，會「以維護國家主權、安全和發展利益為最高原則」，更好融入同服務國家發展大局為使命願景。

澳門特首選舉一向冇驚喜，自1999年首屆選舉以嚟，除咗當年有兩位參選人，其餘幾屆都係「一人參選」嘅局面。所謂嘅選舉於早上10點舉行，400名選舉委員中有398人到場投票，最終岑浩輝以394票高票當選，剩低嘅4票為白票。

現年62歲嘅岑浩輝，比起之前歷任三位特首，佢擁有更加濃厚嘅「中國背景」。岑浩輝1962年出生於廣東中山，之後去北京讀大學，喺廣州曾短期做過律師。1986年，24歲嘅岑浩輝移居澳門，並成功通過公開考試，之後再去葡萄牙科英布拉大學（University of Coimbra）進修，學習語言同法律。1993年，岑浩輝回澳兩年後，成為首批法院嘅司法參事之一。澳門喺1999年回歸中國後，佢被任命為終審法院院長，至今已經25年。

《BBC中文》報道，前澳門民主派議員區錦新指出，北京喺澳門主權移交前，精心挑選咗一批被稱為「十三太保」嘅治澳班子，佢哋接受專門培訓，目的係協助澳門穩定發展，岑浩輝就係其中之一。

除咗出生地之外，岑浩輝同之前嘅澳門特首另一大分別，係佢冇商界背景。澳門媒體人崔子釗指出，過往商界出身嘅特首，往往會陷入官商勾結同利益輸送嘅爭議當中，「坊間甚至有傳，賀一誠今次無法連任，都同利益輸送有關。」

崔子釗形容，依家係北京培育「十三太保」嘅「收成期」，中央更加信任呢批人，「雖然啲商人經常話愛國愛澳，係建制派，但其實北京對本地人都有疑慮，所以寧願用自己人，真正根正苗紅嘅自己人。」

岑浩輝當選後表示，根據基本法，行政長官需向中央政府同特區負責，自己會堅定承擔重大責任，會忠誠履行參選理念同政綱，會全面準確、堅定不移地貫徹「一國兩制」方針，「以維護國家主權、安全和發展利益為最高原則」，以加快推進經濟適度多元發展、「更好融入和服務國家發展大局」為使命願景。

值得注意嘅係，岑浩輝係首位將「融入國家發展大局」寫入政綱嘅港澳特首。呢句話可以追溯到2018年，當時國家主席習近平喺北京接見港澳代表團時提出，港澳應該主動融入國家發展大局，並形容呢個係「一國兩制」嘅應有之義。後來仲被寫入《十四五規劃綱要》，當中提到澳門應該成為世界旅遊休閒中心，擴展中葡合作平台，並共建橫琴同粵港澳大灣區。

崔子釗預測，未來五年澳門將會同中國更加一體化，日後「兩制」功能會更加模糊，只會係一個方便中國吸引外商投資或者進行中葡交流嘅角色。《I》