自中國政府寬鬆貨幣新政於9月24日出台後，中港股市一路瘋漲，港股更喺內地國慶假期期間一路狂升。國家發改委今日(8日)召開記者會，介紹「一攬子增量政策」，市場原本憧憬當局將加碼推出更多刺激經濟措施，結果記者會欠缺「大招」出台，得個「講」字，淨係話「各項政策正在加速推出」。市場質疑當局加大刺激經濟力度嘅決心。港股曾急挫逾2,300點，滬深股市亦衝高回落，上證指數升幅腰斬。

國家發改委主任鄭柵潔今日帶領多名高層官員，以「系統落實一攬子增量政策、紮實推動經濟向上結構向優、發展態勢持續向好」為主題舉行記者會。市場本來預期會公佈一系列重要財政刺激政策，特別喺目前經濟復蘇緩慢嘅背景下，財政政策成為焦點。

瑞銀之前曾經預測，短期內政府可能會推出規模1.5至2萬億元人民幣嘅財政方案，並且明年有機會進一步放大至2至3萬億元。摩根士丹利亦認為，未來可能會有2萬億元規模嘅措施，當中可能包括支持地方政府融資、基建投資同促進內需消費等，甚至有機會涉及銀行再資本化嘅計劃。

不過，發改委今次記者會並無如市場所預期咁，公佈具體嘅財政刺激措施。相反，當局全場不斷「自吹自壘」，聲稱十一黃金周期間市場消費表現強勁，並表示對實現全年經濟發展目標充滿信心。記者會上提到，當局會加強宏觀政策嘅逆周期調節，重點解決國內需求不足嘅問題，並推動民生保障、促進消費、加強投資帶動經濟增長。同時，將會繼續幫助企業應對困難，改善營商環境，並採取一系列綜合政策促進房地產市場企穩回升，但全部得個「講」字。

官媒《央視》更特別以「採取有力有效綜合措施提振資本市場保護中小投資者」為標題進行報道，強調當局會大力引導中長期資金入市，努力提振資本市場，「目前各項政策正在加速推出」，意圖安撫擔心被「割韭菜」嘅散戶投資者們。

根據《彭博》報道，A股近日嘅上升勢頭雖然明顯，但未完全令主要金融機構感到安心。部分策略師同基金經理擔心，喺當局兌現財政承諾之前，A股嘅反彈可能只係短期現象，並且擔心不少股票嘅估值已經過高。

Leo Wealth全球投資解決方案負責人Aleksey Mironenko指出，股市反彈嘅持續性，取決於中國政府喺接下來幾周會推出嘅具體政策，「未來我哋要睇嘅關鍵係中國會唔會再宣佈進一步嘅政策，呢啲措施將會決定我哋嘅投資決策係短期策略，定係長期增持。」

摩根士丹利策略師Laura Wang領導嘅團隊亦喺報告中提醒投資者，A股市場可能已經過熱，並指出當局兌現刺激政策嘅風險。至於今日港股同A股嘅表現分化，彭博產業研究策略師Marvin Chen表示，市場資金似乎出現從港股流向A股嘅趨勢，認為A股可能成為內地未來流動性刺激措施嘅主要受惠者。《I》