英國《金融時報》10月7號報道，隨住中國國家主席習近平加強對社會嘅控制，北京當局根據《中國公民出國旅遊管理辦法》，要求包括幼兒園、中小學、大學教師，以至地方政府及國企員工，交出佢哋嘅護照，並且對佢哋嘅出國活動加強限制。更有地方政府教育局警告教師，出國後不得與外國「敵對勢力」接觸。

該辦法喺2003年已經訂立，當時主要針對中高階官員，限制佢哋出國旅遊嘅自由，同時賦予地方政府權力，針對國企員工制定相應嘅出國規定。呢啲規定包括對出國旅遊嘅頻率、目的地等進行限制。自2010年代中期開始，一啲地區逐步將呢啲規定擴展到教師群體。

去年中國解除新冠疫情嘅旅遊限制後，更多地方政府教育局對教師出國進行更嚴格嘅管控。今年夏天呢啲措施更進一步加強，擴大至更多地區同公營機構。《金融時報》訪問咗十幾名公營機構員工，並查閱唔少城市教育局嘅通告，發現出國旅遊嘅限制範圍，已經涵蓋到學校、地方政府同國企普通員工。

今年3月，溫州市甌海區教育局透過官網發布咗一份通告，要求所有幼兒園、中小學教師交出護照，並提醒佢哋，前往海外期間唔可以接觸「敵對勢力」，包括法輪功等被禁組織。教師嘅護照會被公安局嘅邊境管制機構登記，佢哋如要出國，必須先經學校批准，每次出行時間通常會被限制喺20日以內。

對於拒絕交出護照或者未經許可出國嘅教師，通告指出，違規者將面臨「批判教育」或者交由反貪腐機關處理，佢哋亦可能被禁出國旅遊二至五年。

國企員工嘅出國限制，似乎同中國加強打擊外國間諜活動有關。一名南京銀行嘅基層員工透露，佢喺2023年入職時被要求交出護照，而離職後亦要等六個月先可以取回。另外，一名湖南省地方政府投資基金嘅中層管理人員則表示，即使獲得九個不同部門批准出國，最終仍未能取回護照，亦冇人解釋原因。

呢啲限制亦影響到國企嘅退休員工。一名76歲、十幾年前從國有飛機製造公司退休嘅老人表示，佢今年被前雇主收回護照，並被禁止出國探親，理由係「安全原因」。《I》