台灣《中央社》報道，多名中國律師指出，中國今年嘅看守所已經爆滿。上半年被捕人數增加18.5%，被定罪人數亦增加8.47%。主要原因係經濟壓力大，唔少人鋌而走險；仲有啲原本可能唔算犯罪嘅行為，依家都被定罪，出現咗「合法行為輕罪化」嘅情況。

根據中國公安部喺1月發布嘅數據，中國現時有超過2300個看守所。呢啲看守所主要羈押被捕、刑事拘留嘅人犯。被判處一年以下有期徒刑，或者餘刑喺一年以下，唔方便送去勞改場所執行嘅罪犯，亦可以由看守所監管。

自7月以嚟，多名中國律師相繼喺社交平台發布影片，提到「今年看守所已經爆滿咗」。

四川律師王瑞表示，中國好多地方都計劃擴建看守所。佢去看守所會見當事人，當事人話佢哋一個12人嘅房間，竟然關咗20幾人；10米長嘅大通鋪，人迫人，瞓覺都要側住瞓。喺酷熱天氣下，要擠埋一齊，唔單止冇冷氣，連風扇都冇，有人乾脆直接瞓喺地下。

點解看守所會人滿之患？王瑞提到，中國最高人民檢察院公布，檢察機關今年上半年批捕36.7萬人，起訴76.1萬人，分別比去年同期增加18.5%同6.8%。

另外，根據中國最高人民法院公布，今年上半年各級法院判處生效被告78.8萬人，亦比去年同期增長8.47%。

至於點解捉人捉得多咗？包括王瑞喺內嘅多名中國律師指出以下原因：

一、經濟形勢壓力大。房貸、車貸、工作壓力之下，新舊型經濟犯罪頻頻出現，唔少人選擇鋌而走險，從事灰色或者黑色產業，例如傳銷、詐騙、洗黑錢等；企業因為收入減少，虛開發票、合同詐騙等違法行為亦多咗。

二、合法行為輕罪化。好多律師辦案時發現，原本可能唔係犯罪嘅行為，警察以前可能唔理，但依家都被定罪。比如，做啲小買賣因為缺乏資格或許可，被定罪為非法經營；做生意因為資金周轉唔靈拖欠啲錢，都可能被定罪為詐騙或者合同詐騙。

三、輕罪重罪化。比如，上山採啲野菜，到河裡撈啲小魚小蝦，依家一唔小心就被定罪捉咗去；甚至打啲小麻將、開個小茶館都被定罪。

四、嚴打。今年內地多地嘅公安檢察機關加強嚴打行動，例如掃黃、打賭場、新型經濟犯罪以及醫療反腐等，都係重點打擊目標。

不過，多名律師提到，因為看守所爆滿，依家成功申請取保候審嘅機會都相對高咗。