昨日（2日），立法會議員兼行政會議成員葉劉淑儀喺X平台（即前Twitter）發英文帖文，建議以色列人考慮移居香港。佢話：「以色列可能打贏咗對哈馬斯同真主黨嘅戰鬥，但輸咗國家。任何想要一個安全地方撫養子女同生活嘅以色列人，都可以考慮嚟香港，我哋呢度可以生活得好快樂。」

點知呢番言論即刻引來以色列駐香港大使館嘅官方回應。大使館喺留言中話，以色列人係堅韌嘅民族，佢哋曾經面對好多挑戰，並且喺挑戰中變得更加強大。大使館更加諷刺葉劉建議移居香港嘅言論，強調以色列堅守和平、安全同民主自由嘅價值，令國家成為繁榮經濟體，並擁有近9,000間科技公司。最後仲祝葉劉同全香港市民新年快樂，用中文結語：「猶太新年5785即將到來，祝願全球繁榮昌盛，國泰民安。」

除此之外，新西蘭支持巴勒斯坦組織「SteamOutLoud」亦留言插一腳，話：「Hamas、Hezbollah、Houthi 、Hong Kong，他哋同字母’H’有關嘅歷史都唔係幾好。」

另一方面，香港民意研究所趁住中國國慶前夕發表咗一個有關社會同自由指標嘅調查結果。訪問咗673名港人，佢哋用10分滿分評估幾個核心社會指標，結果顯示，市民對「安定」俾咗6.07分、「法治」有6.05分、「自由」5.47分、「繁榮」5.26分，而「民主」只得4.65分。其中只有「安定」比半年前有顯著上升，其餘幾個指標都無明顯變化。

民研所嘅數據顯示，對比九七回歸時，跌幅最大嘅係「繁榮」，下跌咗3.24分，跌幅達40.2%；其次係「民主」，跌咗2.05分，跌幅30.6%；「自由」減咗1.59分，跌幅22.5%；「安定」下跌咗1.26分，跌幅17.2%；而「法治」跌幅最少，跌咗1.12分，跌幅15.6%。至於「公平」同「平等」等非核心社會指標，評分亦比九七時有明顯下跌。

喺「自由」嘅十個次指標中，跌幅最少同得分最高嘅係「出入境自由」（7.82分）同「信仰自由」（7.68分），但學術自由由九七嘅8.02分跌至6分；言論自由由7.14分跌到5.06分；新聞自由由7.15分縮到4.81分；出版自由更由7.21分跌到4.61分。曾經有「遊行示威之都」之稱嘅香港，喺「遊行示威自由」得分上，更顯著偏低，只有3.85分。《I》