國家主席習近平早前一句「要努力提振資本市場」，內地隨即展開一系列救市措施，A股市況如雨過天青，截至上星期五（27日），A股總市值單周暴漲9.6萬億元人民幣，創下史上最大單周漲幅。周一，上海股市大升8.06%，深圳股市更飆升近11%。港股亦跟隨升勢，收市時升超過3%。市場「錢潮」湧現，投資者熱情高漲，帶動證券行開戶數量急劇增加。

內媒報道，近一週新開戶嘅投資者中，「00後」同「90後」佔咗七成以上，部分券商甚至喺國慶安排值班，應對開戶熱潮。有股民喺朋友圈激動曬出收益，話「一早賺了52萬」，直呼「撿錢！」。

隨住股市節節上升，原本打算國慶假期喺屋企休息嘅股民，開始搵機票訂酒店，仲有啲本來打算「窮遊」嘅人都改變主意，提升咗旅遊預算。有網友甚至曬出升艙截圖，笑言「這幾天A股太爭氣了，自費給後天機票升艙了」。

除咗呢啲搞笑嘅網民回應之外，亦有不少投資者喺社交平台建議：「建議A股不放假，我們要乘勝追擊，繼續大漲！」，「因為A股，第一次不想放假」。

更有股民為咗趁住股市高漲，暫停咗提前還貸計劃，將手頭上嘅資金全部轉入股市。人行日前發佈存量房貸利率調整嘅細則，預計平均降幅大約0.5厘。有股民計算過，如果再加埋貸款市場報價利率（LPR）嘅下調，明年重定價日，房貸利率有機會降至3%左右，減幅達0.75個百分點。佢話，之前考慮提前還款，主要係因為市場收益唔高，但股市咁強，3%左右嘅回報已經「問題不大」。

此外，內媒亦引述券商負責人表示，佢哋現時已經係24小時開戶服務，連國慶假期都取消咗，務求為客戶提供全面嘅開戶、諮詢同外拓服務。唔少證券公司嘅業務量最近暴增，日均開戶數量甚至翻倍。德邦證券表示，截至9月26日，本週日均新開戶數量較前三周增長50%，每日活躍交易用戶亦比上星期上升28%。有券商分公司負責人亦提到，近期諮詢量明顯上升，較之前增加咗幾倍。

近來，券商嘅開戶量急增2至4倍，就連以往唔活躍嘅帳戶都開始回流。一般情況下，中國證券登記結算公司嘅營業時間與交易所同步，周末通常唔會開展業務。但由於開戶需求急增，有啲券商甚至要喺周末加班處理開戶審批，員工已經進入「戰鬥狀態」。

網上圖片顯示，鄭州一間國元證券因應股市暴漲，宣布取消國慶假期，確保客戶能夠即時開戶。開戶嘅熱潮甚至蔓延到各行各業，外賣員都著住制服去開戶。更有網民搞笑分享，話佢朋友雖然交通意外住院，仲撐住拐杖去證券行開戶。有內地網友更形容，A股現時猶如「武則天守寡」，意指股民已經「失去咗李治（理智）」。

但喺「國家隊」大力托市、散戶狂熱入市嘅同時，有50間上市公司嘅股東或高層公佈咗108次減持，合共減持1.52億股，仲有超過40間公司預告將進一步減持，呢啲舉動引嚟股民批評「真正的敵人不在外部」、「怕晚了就割不著新韮菜」，仲有留言稱「自己都不看好的自己的公司，靠公司賺錢哪有套現來得快」。《I》