經濟前景未明，法律界嘅生意都受到波及，尤其係主力處理房地產同上市等相關業務嘅律師樓開始大規模裁員。不過，隨住破產同追數個案增加，專做清盤、債務重組等業務嘅律師，生意反而不跌反升。

《星島》今（1日）報道，有執業大律師表示，經濟不景令打官司嘅成本提高，導致民事訴訟量下降，有事務律師轉打刑事訴訟，變相影響咗大律師嘅客源，整體收入大幅減少約三分之一。

香港律師會會長湯文龍話，香港一向有「法律先行」嘅說法，但面對全球經濟放緩，本地法律界嘅業務難免受影響，尤其係樓市同首次上市集資（IPO）由幾年前嘅高峰回落，專做呢類業務嘅律師行面臨好大壓力。

香港政策研究所法治研究中心主任、律師陳澤銘都認同，律師行業本質上係服務市民，生意自然會同經濟掛勾，尤其係「非訴訟」類業務，好似房地產、上市等，近年係受衝擊最嚴重嘅範疇。

陳澤銘話：「本港樓市交易要經律師樓處理，但無論係商業物業定住宅，市場表現都好差，就算政府全面撤辣，樓市嘅小陽春效應都已經衰退。」佢仲話，聽聞部分專做非訴訟業務嘅律師樓已經開始裁員，仲有啲國際律師行因為地緣政治嘅考慮，傳出會撤出香港。

法學教授兼執業律師蘇文傑表示，主攻企業融資、IPO同企業合併收購（M&A）嘅律師，部分人已經轉型，有啲人由私人執業轉做企業內部律師（In-house lawyer），或者從事企業合規工作。佢仲話，喺美國上市嘅公司因為地緣政治關卡，相關工作可能會減少；另外，專做土地轉讓、婚姻監禮等單一業務嘅律師樓，面對住更大挑戰，啲法律服務收費可能要作出調整。

執業大律師陸偉雄指出，事務律師尤其受經濟影響，特別係主做樓市買賣嘅律師，生意幾乎「停咗八、九成」。民事訴訟量亦有所減少，佢解釋：「以前業主一見商舖拖租就即刻追數，但而家打官司成本太高，只要欠租唔係太離譜，都未必即刻上庭。」仲有夫婦離婚嘅財產分配訴訟，因為「告人成本太高」，個案數量都有減少。

佢補充，事務律師有資格參與裁判法院同區域法院嘅刑事訴訟，所以近年唔少律師轉做刑事案件，而法院嘅當值律師計劃亦成為熱門選擇。為咗應付開支，有啲律師樓甚至變得更進取，收費「唔會平啲，反而仲會再高啲」。佢坦言，大律師嘅工作機會因此減少，行內整體收入大跌四分一至三分一，「有名氣嘅大律師可能仲有固定客源，但啲新人大律師就真係好難捱。」

不過，唔係所有律師行業都遭受打擊。湯文龍指出，訴訟同爭議解決等業務仍然好有市場，加上港交所行政總裁陳翊庭7月都提到，香港市場有回暖跡象，今年新股發行量全球排第三，仲有過百宗上市申請處理緊，前景可以「審慎樂觀」。佢認為，經濟係周期性發展，法律界過去都克服咗唔少困難，無必要太過擔心。

陳澤銘補充，經濟差嘅時候，破產同追數個案會相應上升，某啲訴訟業務反而會增加。蘇文傑亦認同，處理清盤、債務重組同爭議訴訟等業務，律師行生意有望更蓬勃，「呢啲高技能嘅法律服務，例如人工智能應用同跨境法律諮詢，收費有機會唔跌反升。」《I》