《自由亞洲電台》昨（19日）報道，美國參議院外交關係委員會，喺星期三（18日）特別為壹傳媒創辦人黎智英舉行記者會，讚揚佢對民主同新聞自由嘅堅定信念，並呼籲香港特區政府立即釋放黎智英同所有政治犯。

呢次記者會突顯出拜登政府、美國政界同國際民主社會對香港嘅關注從未減退。出席嘅有民主、共和兩黨內最資深嘅議員，亦有美國國務院負責香港同人權事務嘅官員；多個國家駐美國嘅領事館都派代表出席。

黎智英嘅仔喺記者會上批評港府正殘酷對待佢父親。中國外交部駐港公署發言人則發表聲明，未有點名但批評美國政客「公然為黎智英撐腰」。

參與並發言嘅議員，包括參議院外交關係委員會主席卡丁（Ben Cardin）、眾議院前議長佩洛西（Nancy Pelosi）、參議員里施（Jim Risch）、默克利（Jeff Merkley），以及眾議員史密斯（Chris Smith）、麥高文（Jim McGovern）同金映玉（Young Kim），佢哋喺兩黨內都擔當重要角色，對美國外交政策同對華立場有深遠影響。

美國國務院派出東亞及太平洋事務助理國務卿康達（Daniel J. Kritenbrink）同民主、人權與勞工事務助理國務卿蘭德（Dafna Rand）出席；此外，英國、德國、瑞典、澳洲、捷克、愛沙尼亞、意大利等至少七個國家駐美國嘅領事館亦有代表出席。

被中國政府制裁嘅眾議員史密斯，形容《港區國安法》係一條惡法。佢指出：「《港區國安法》唔單止係惡法，喺場嘅所有人都有可能被呢條法例起訴，面臨多年刑期。我同參議員卡丁甚至可能被判終身監禁。」

同樣被中國制裁嘅眾議員麥高文表示，向被囚嘅黎智英傳達佢未被遺忘嘅訊息至關重要，亦向北京同香港政府發出強烈呼籲：「將行使基本人權定為犯罪，係懦弱同恐懼嘅表現，證明你哋唔相信自己可以喺理念嘅較量中取勝，亦無法贏得民心。過去幾年喺香港發生嘅一切係一場悲劇，但呢個故事仲未完結。我哋唔會忘記。」

參議員里施指出，黎智英嘅「罪名」係和平支持民主同經營報紙。中國同香港政府咁樣對佢十分可恥，亦係對司法嘅極大嘲弄。來自加州嘅眾議員金映玉表示，佢嘅選民十分關心香港，亦關注佢哋嘅國會代表喺華府為香港所做嘅一切，承諾會繼續推動《香港制裁法》（Hong Kong Sanctions Act）嘅立法程序。參議員默克利認為，《基本法》已被《港區國安法》所破壞，港府起訴黎智英係對言論、集會、新聞同出版自由嘅攻擊。

一直為爭取父親早日獲釋而奔走嘅黎崇恩表示，黎智英創辦嘅《蘋果日報》喺過去26年一直扮演監察權力嘅角色，直到報社被迫關閉。面對各種威嚇，黎智英從未退縮或動搖原則，甚至決定留喺香港以確保員工安全。

黎崇恩表示，年近77歲、患有糖尿病嘅黎智英被單獨囚禁，喺赤柱監獄嘅待遇如同酷刑，需忍受高達攝氏38度嘅高溫，每日只有50分鐘放風時間，缺乏日照同與他人接觸。懲教署亦拒絕佢由探訪嘅神父手上領受聖餐嘅要求。黎智英最近因糖尿病病情加重，無法出庭。而香港當局因為佢對自由嘅堅持，持續拘押佢，無異於慢慢折磨佢，試圖奪走佢嘅生命。

中國外交部駐港公署發言人喺星期四（19日）發表聲明，未有點名批評佩洛西等人「公然為黎智英撐腰」，又指美國參議院「少數政客」妄議香港特區司法個案，干預香港特區司法，敦促美方同「少數政客」立即停止包庇美化違法犯罪分子，停止干涉香港事務同中國內政。《I》