《獨媒》報道，建制派議員一向早知三日風，連颱風動向都比市民更早收到消息。今朝打工仔關注政府何時「轉波」嘅時候，社福界立法會議員狄志遠喺電台節目上透露，較早前已經收到政務司司長陳國基嘅WhatsApp短訊，知會今日下午1點前會除下8號風球。主持人感到嘩然，反問私訊議員嘅做法係咪恰當。對此，狄志遠解釋，訊息內容簡單直接，僅係幾十字，認為陳國基主要係想交代政府嘅工作進展，而非叫議員去公開相關訊息。

《信報》政情專欄今日提到，超強颱風「摩羯」來襲期間，不少議員都收到陳國基親自發嘅短訊，提前通報政府應對颱風嘅部署，當中清楚提及昨日會喺5點半至6點半之間懸掛8號風球，並且教育局亦會公布停課安排，仲預測今日會有較大雨勢，以及掛9號風球嘅機會較低。

狄志遠今朝喺商台節目《在晴朗的一天出發》上承認，自己的確收到來自陳國基嘅WhatsApp短訊，而且係獨立發出，唔係議員群組發送，佢相信其他議員都同樣有收到。佢提到，呢個「私訊機制」其實早喺5月紅雨期間已經用過，當時西貢出現水浸情況，陳國基就曾經私訊交代政府嘅應對細節。佢認為司長嘅訊息講得好詳細，甚至包括部門如何分工，令議員了解到政府係積極處理問題。

至於昨日嘅私訊內容，狄志遠話喺早上未到10點已經收到，提及將會喺「5點半至6點半」改掛8號風球，呢個時間同坊間流傳嘅4點至7點嘅消息只係有少少出入。佢向自己嘅議辦同事交代，方便喺市民查詢時可以有一個準確嘅回應。

狄志遠仲透露，今朝早又再收到司長嘅短訊，內容提到「摩羯」嘅風速比預期快，吹襲期間有少數市民受傷，不過已經出院冇大礙；另外，政府將會喺「一點前落八號波（球）」。雖然司長冇講到確實嘅時間，但訊息好簡單，只係幾十隻字，狄志遠認為呢個短訊有少少「預告效果」，但唔係精準資訊，佢估計司長嘅目的係向議員交代「關愛隊出動」等應對措施。

當主持人問到司長以短訊通知議員嘅做法係咪合適，狄志遠回應話，政府正式發布嘅精準訊息仍然要由相關部門負責，司長發短訊嘅目的應該係令議員方便安排工作，佢認為呢啲訊息性質上屬於「交代」多於「通報」，而非叫議員提前向外發布相關訊息。

狄志遠最後補充，政府唔單止要考慮科學嘅颱風應對方案，仲要注重「消息管理」，因為即使早十分鐘或者遲十分鐘公佈風球消息，都可能引發市民不滿，影響社會秩序。《I》