《美國之音》報道，喺美中關係日益緊張，戰略競爭愈演愈烈嘅時候，美國唔少州政府開始由之前投資嘅中國公司抽走資金，有啲州政府官員甚至將呢啲撤資行動當做自己嘅政績或施政目標，作為競選連任嘅賣點。

密蘇里州財政廳長馬萊克（Vivek Malek）曾經推動州內最主要嘅退休基金從中國公司撤資，使得密蘇里州成為全美最早咁做嘅州之一。

馬萊克而家正尋求連任，佢將喺8月6日舉行嘅共和黨初選中同其他候選人競爭，而由中國公司撤資就成為佢競選連任嘅主要賣點之一。佢嘅對手們都一樣強烈主張切斷同中國嘅金融聯繫。今年有唔少參與競選嘅候選人都將北京視為美國嘅頭號威脅。

印第安納州同佛羅里達州都對各自公共退休基金投資中國某啲公司嘅行為作出咗限制。雖然類似嘅立法喺亞利桑那州被否決，但喺伊利諾州同俄克拉荷馬州就已經立案。

中國係全球第二大經濟體，曾經係世界經濟嘅火車頭。但自從新冠疫情爆發以嚟，中國經濟一蹶不振，疫情結束後都復甦乏力，加上美中戰略競爭加劇，唔少外國公司撤離中國，對中國公司嘅投資亦今非昔比。

美聯社引述由創投家安德魯金（Andrew King）領導嘅非營利組織「未來聯盟」發表嘅一份報告指出，喺2018至2022年間，美國公共退休基金同大學捐贈基金喺中國嘅投資總額約1,460億美元。報告仲指出，美國超過五分之四嘅州至少有一個公共退休基金投資喺中國或香港。

安德魯金話，「坦白講，如果到依家仲繼續進行呢啲投資應該會令人感到羞恥」。佢指出，中國利用美國公司嘅知識產權仿製同樣嘅產品，然後壓低產品價格。

不過，一啲投資官員同經濟學家對美聯社表示，佢哋擔心美國一啲州政府推出嘅零碎撤資政策會影響美國退休人員嘅投資回報。

經濟學教授、德州理工大學自由市場研究所執行董事鮑威爾（Ben Powell）表示，「絕大多數呢啲政策都唔明智，反而會令美國公民變窮」

美國全國州退休管理者協會（NASRA）亦反對州政府發布強制撤資命令，強調呢類命令應由美國聯邦政府根據國家安全或人道主義利益針對特定公司下達。

最近，美國財政部提議禁止美國公司投資中國可能具有軍事用途嘅人工智慧系統，例如武器瞄準系統。今年5月，拜登總統親自阻止咗一間中國支持嘅加密貨幣採礦公司喺懷俄明州嘅一處核導彈基地附近購買土地，稱其為「國家安全風險」。

過去，美國嘅州政府、市政當局同大學曾因南非嘅種族隔離政策而撤資。一啲州亦曾因為健康因素從菸草公司撤資。俄羅斯入侵烏克蘭後，一啲美國州政府亦從俄羅斯撤資。

美聯社指出，喺越嚟越多嘅州政府決定從中國公司撤資嘅同時，亦有越嚟越多嘅州限制或禁止中國人在州內購買土地或房地產。根據阿肯色大學全國農業法律中心嘅統計，現時全美已有20多個州禁止外國人擁有農業用地。《I》