《自由亞洲電台》報道,中國最近罕有地撤銷對美國軍工企業、衛星通訊巨頭「衛訊」(Viasat)嘅制裁,又冇解釋原因,引起各界揣測。有小粉紅認為係因為該公司「知錯能改」,不再對台軍售。不過有通信專家同企業政治風險專家指出,其實係因為中國依賴該公司全球衛星通訊服務關鍵技術,今次明顯係制裁錯咗。
中國對美國「衛訊」制裁約7個月後,香港親中傳媒《鳳凰衛視》喺周一(22日)中國外交部例行記者會上突然提問話,近期有傳聞話「衛訊」正尋求同中方有關企業開展商業合作,希望外交部回應。外交部發言人毛寧趁機宣布:「中方依據《反外國制裁法》等相關法律,鑑於採取反制措施所依據的情形發生變化,決定取消對衛訊公司的反制措施。」
今次係中國首次公開宣布取消對一間涉及台灣軍售嘅美國公司嘅制裁,由於官方無進一步說明取消制裁嘅原因,引來各方揣測。
微博上,「中方決定取消對美國衛訊公司的反制措施」成為關鍵詞,大批微博大V和「小粉紅」以一致口徑,慶祝「又有一間美國公司跪了」,聲稱「聽聞」係因為「衛訊」不再對台軍售,部分網民仲話「中國人說知錯能改,善莫大焉。」
一名要求匿名的中國資深通信工程師指出,即使中國一直聲稱成功「自主研發」衛星通信,但因為人才、技術同覆蓋範圍嘅限制,效能一直成疑。而衛訊子公司Inmarsat,其通信系統係目前全球最穩定、快捷嘅,所以唔少中國軍事、科研設備都要用Inmarsat技術,以配合國家發展需要。
Inmarsat係全球唯一擁有並營運衛星網絡嘅服務商,幾乎壟斷全球海、陸、空等衛星電話、通訊同網絡市場,亦係唯一獲准連接中國衛星接取站嘅全球衛星通訊供應商。中國政府高度依賴Inmarsat技術,廣泛用於「一帶一路」等國家重要政策、軍事戰略、航天科研、極地考察同《央視》直播等。
係軍事通信方面,雙方合作密切,特別係習近平上台之後,2014年Inmarsat喺北京成立辦事處;2015年10月習近平訪英期間亦特別參觀了Inmarsat嘅總部,顯示對該公司嘅重視。
值得注意嘅係,去年中,即喺中國外交部今年1月宣布反制裁「衛訊」前不久,「衛訊」剛以73億美元完成全面收購Inmarsat。美國政治風險管理顧問Ross Feingold認為,今次事件明顯係中國知道制裁錯咗,所以先要突然取消制裁。《I》