美國總統拜登周日（21日）宣布唔會競逐連任，並公開支持副總統賀錦麗接棒參選。美聯社周一（22日）最新統計顯示，賀錦麗已經獲得超過2600名民主黨全國代表支持，超過黨大會提名門檻1976票。賀錦麗隨即宣布已取得足夠黨代表支持，鎖定民主黨總統候選人資格。

早前，賀錦麗競選辦公室公布，佢確定出選後24小時內，已籌得8100萬美元（約6.3億港元），美聯社報道形容呢個係歷屆總統選舉一天內籌得嘅最高金額。

賀錦麗周一喺特拉華州威爾明頓總部向競選團隊發表講話，稱得知拜登退選時心情如坐過山車，但相信自己最終會勝選。佢又批評共和黨總統候選人特朗普剝削女性、敲詐消費者、違反遊戲規則，並強調自己喺氣候變化、能源同經濟政策上嘅成就，稱大選唔只係佢同共和黨候選人嘅競爭，更係關於美國未來。

美國政治新聞《POLITICO》分析認為，賀錦麗一旦當選，會繼續加強對亞太地區同盟嘅合作以制衡中國，並對中國抱較強硬嘅立場。

賀錦麗過往多次就中國敏感議題發聲。喺佢擔任參議員嘅時候，曾喺2019年10月宣布支持《香港人權與民主法案》，成為法案嘅共同提案人。該法案要求美國政府制裁「侵犯香港人權嘅中國及香港官員」。

賀錦麗曾高調支持香港民主運動，喺2019年8月反修例運動期間，曾表明與香港人站喺一齊，支持所有人和平示威嘅權利。佢亦批評北京冇尊重香港人嘅自主同權利，又斥責香港政府對和平示威者使用過度嘅武力。

喺新疆人權議題上，賀錦麗曾推動《維吾爾人權政策法》，係該法案嘅共同提案人。法案賦予美國政府權力，制裁侵害新疆人權嘅個人或實體。台灣問題方面，賀錦麗喺2022年9月表示會繼續支持台灣自衛。同年，佢喺出席洪都拉斯總統嘅就職儀式時，與台灣時任副總統賴清德會面。賴清德之後當選台灣總統。

對華貿易方面，賀錦麗喺2020年嘅副總統大選辯論中，批評特朗普政府搞輸咗「貿易戰」，質疑其關稅政策損害咗美國經濟，卻無重新平衡中美關係。不過佢亦支持減少西方經濟體對中國嘅依賴，佢喺去年接受CBS專訪時表示，「唔係要退出，而係要確保我哋保護美國利益，並確保我哋喺規則方面處於領導地位，而唔係跟隨其他人嘅規則。」

針對台灣方面，2022年9月，賀錦麗同韓國總統尹錫悅會晤時重申美國會繼續支持台灣，反對任何試圖改變現狀嘅單方面行動，「美國致力於維護基於規則嘅國際秩序，並確保台灣海峽嘅穩定。」

2022年9月28日訪問日本期間，佢喺日本橫須賀海軍基地嘅美國霍華德號驅逐艦上發表演說，「中國展現其軍事和經濟實力，嚟脅迫和恐嚇其鄰國。我哋喺東中國海和南中國海目睹咗令人不安嘅行為，最近喺台灣海峽亦發生咗挑釁行為。」《I》