眾所周知，「休班警」因經常涉及犯罪見報，更被唔少網民譏諷為本港最大犯罪集團。近幾日，就有好幾單警務人員涉入嘅案件曝光，真係可謂罄竹難書。

24歲男警程朗，據知駐守大埔警區，涉嫌喺2024年6月3日喺一住所單位內強姦一名21歲女子被捕，被暫控一項強姦罪，案件本月19號喺粉嶺裁判法院提堂，被告暫時唔使答辯。庭上，控方要求禁止報道事主資料，包括佢同被告嘅關係同案發地點等，裁判官批准咗呢個申請，案件押後到9月13號再訊。被告申請保釋被拒，之後要求26號再到庭作保釋覆核。

32歲男警黃耀聰，2022年涉嫌造假口供，再喺2023年涉向上級訛稱投訴人唔再追究，導致9宗案件被終止調查。黃耀聰被起訴「偽造」同「公職中行為失當」兩項罪名，本月23號喺區域法院再訊。被告擬不認罪，控方預計會傳召10名市民證人、13名警員作證，並且唔會依賴任何警誡口供。法官彭中屏將案件排期到2025年8月5號作審前覆核，9月1號至19號進行15天嘅中文審訊，被告續准保釋。

24歲男警廖健良，涉嫌喺申請貸款時，向3間財務公司隱瞞個人財務狀況，誘使財務公司職員批核貸款，涉案金額達105萬元。廖健良被控3項欺詐罪，本月22號喺東區裁判法院再度提堂，被告否認所有控罪。主任裁判官蘇文隆將案件押後到9月16號再訊，被告以原有條件繼續保釋。《I》