中共二十屆三中全會18日閉幕,今(19日)記者會上特別強調會議文件起草小組由習近平親自擔任組長,又自吹自壘稱「共提出300多項重要改革舉措」,雖然聽起上嚟好似好「巴閉」,但《自由亞洲電台》分析,救經濟方面根本「零方案」,只強調「管得住」、「鞏固和發展公有經濟」等口號,不但冇新嘅經濟政策,仲將計劃經濟放喺首位,根本係開倒車。
呢場記者會由中共中宣部副部長、國務院新聞辦公室主任莫高義主持。對會議審議通過嘅《中共中央關於進一步全面深化改革、推進中國式現代化的決定》,中央政策研究室副主任唐方裕「擦鞋」稱,文件係由中共總書記習近平親自擔任文件起草組組長,「全程擘畫、組織調研、精心指導、把脈定向,發揮了決定性作用」。
唐方裕又介紹,《決定》共15個部分、60條,分三大板塊。第一板塊係總論,第二板塊係分論,以經濟體制改革為牽引,全面部署各領域各方面嘅改革。第三板塊主要講加強黨對改革嘅領導、深化黨嘅建設制度改革。《決定》「共提出300多項重要改革舉措,都是涉及體制、機制、制度層面的內容,其中有的是對過去改革舉措的完善和提升,有的是根據實踐需要和試點探索新提出的改革舉措」。
雖然呢份文件提到「經濟體制改革」,但《自由亞洲電台》分析,今次會議公報,不但冇新嘅經濟政策,仲將計劃經濟放喺首位,根本係開倒車。
歷屆中共三中全會,大多會制定未來五至十年嘅經濟政策方向,會議公報提到要面對當前經濟困境,強調既「放得活」,又要「管得住」;喺引導非公有制經濟發展之餘,又要「毫不動搖鞏固同發展公有制經濟」,要構建全國統一大市場,完善市場經濟基礎制度。全會再為「全面深化改革」定下必要嘅基調,「貫徹黨嘅全面領導」。
總體嚟睇,公報大幅弱化市場、改革、效率成分,強化咗黨嘅領導;除咗對「高質量發展」著墨頗多,關乎民生嘅城鄉、開放、民企、財稅嘅表述同以前相比,冇任何進步,甚至仲倒退咗。
《自由亞洲電台》引述悉尼科技大學教授馮崇義表示,從三中全會公報嚟睇,習近平一黑到底,「躺平」拒絕救經濟。馮崇義指出,全世界都期望習近平喺經濟上會有啲救市或救經濟嘅方案,但睇到呢份公報之後,應該會徹底失望。佢用嘅親信極端無能,亦反映習近平撞到牆都唔回頭。面對中國嘅全面危機,佢根本拎唔出辦法,或者根本唔想解決,只係堆積啲政治口號嚟敷衍。
中國知名歷史學者章立凡表示,中共當局提出2029年同2035年兩個目標時間節點,自以為能緩過嚟。當談到改革開放最重要嘅指標——市場經濟時,仲係「既要」、「又要」,既要國有資本,又要私企。但決定中強調黨嘅領導其實係最大嘅「鳥籠」。
章立凡強調,中共以「改革」包裝倒退。倒退中遭遇重挫,作出咗些許微調,號稱「改革」名不符實,事實上仲喺向計劃經濟同公有制倒退。《I》