消委會日前發布有關瓶裝水嘅測試報告，引發「農夫山泉」大興問罪之師發出律師信，甚至派出執行董事踩上消委會北角總部。消委會今早道歉跪低，指原本被列為「天然礦泉水」嘅農夫山泉，現已改單獨列為「飲用天然水」，並向公眾道歉。

報告於周一發表後，「農夫山泉」隨即發出律師信，要求消委會澄清及道歉，指控消委會存在「適用標準錯誤」、「標準判斷錯誤」同「明顯主觀誤導」，包括強行將香港銷售嘅產品套用歐盟標準，罔顧唔同法規要求下嘅生產背景差異云云。其實就係想強調「我係中國嘅天然水，所以歐盟嘅礦泉水標準唔適用於我」。

消委會今（18日）作出澄清，指早前因為「農夫山泉」成分列表標示嘅4款礦物質含量同「天然礦泉水」相近，所以將其歸類為「天然礦泉水」，並採用歐盟訂定嘅「天然礦泉水」溴酸鹽最大限值每公升3微克作為檢測指標。但經過同「農夫山泉」代表會面後，了解到該產品並非「天然礦泉水」，亦唔係「純淨水」，而係「飲用天然水」，採用中國《食品安全國家標準包裝飲用水》標準。

消委會將該樣本改為單獨列作「飲用天然水」類別並重新評分。從消費者角度而言，若以測試結果嘅TDS值作比較，該樣本口味較一般「天然礦泉水」為淡，同一般「純淨水」比較則較濃。

至於溴酸鹽方面，消委會根據歐盟有關飲用水嘅溴酸鹽最大限值為每公升10微克，此限值與《食品安全國家標準包裝飲用水》一致，而該樣本嘅檢出量（每公升3微克）屬「飲用水」準則值範圍內，並遠低於上述準則值，可以安全飲用。重新評分後，該樣本嘅整體表現由4.5星調整至5星。

消委會重申，是次全部30款測試樣本嘅化學安全及微生物測試結果理想，沒發現有害物質超出相關準則值，消委會喺月刊文章、新聞稿及其他傳訊文件，以至記者會上嘅發言均清楚指出是次測試嘅全部樣本（包括「農夫山泉」該樣本）均可安心飲用。

消委會強調，報告主旨並非要話產品有安全問題，而係為各樣本嘅性價比同瓶裝水膠樽對環境構成嘅影響，提醒消費者瓶裝水塑膠瓶一般只能使用一次，而降解塑膠可能需要幾百年時間，消費者宜嘗試改變生活習慣，從源頭減塑。消委會對是次測試因樣本歸類出現落差而引起嘅誤會表示抱歉。

「農夫山泉」表示已收悉《消委會就「農夫山泉」測試樣本結果嘅澄清》，測試結果充分顯示「農夫山泉」產品全面符合相關標準，可以安全飲用。《I》