《自由亞洲電台》報道，近年香港嘅洗腦「愛國教育」無處不在，就連習近平回信畀培僑學生一周年，都特別舉辦分享會，完全接軌大陸。出席者包括教育局長蔡若蓮、校監曾鈺成，仲有十幾間學校400多名師生。有教育界人士指出，培僑中學已成為中共革命根據地「井岡山」，學生被逼過去「朝聖」。

去年7月，中國國家主席習近平回信畀培僑中學高一年級全體學生，不少親中傳媒大肆報道，連官媒央視都專程到學校採訪。中央電視台去年報道：「收到習主席的回信後，學生們非常激動，他們說習主席的這一份禮物非常珍貴……」

一年過去，港府同校方依然未淡忘，繼續大肆宣傳。教育局聯合多間學校，周一（8日）喺培僑中學盛大舉行「習近平主席回信勉勵香港培僑中學學生一周年」分享會。政府更發新聞稿宣傳分享會，出席嘅有中聯辦代表、培僑校監曾鈺成，以及來自教育局安排嘅十多所中學師生，共有400幾人參加。

教育局長蔡若蓮表忠話，過去一年積極貫徹落實「習主席回信精神」，會持續「優化」內地交流和考察計劃，讓學生由多角度「親身體驗國家最新發展和成就」，幫助佢哋「把讀萬卷書與行萬里路結合起來」。但究竟「回信」可以有乜嘢精神，蔡若蓮無再作解釋。

校監曾鈺成喺文章中指，「只要繼續沿着習主席指引的方向前進，一定可以辦出更高質量、更高效能的愛國主義教育」。亦有中四學生以「學習習主席回信精神」為題撰文，指「香港青年應高舉愛國大旗，而培僑人則應肩負向其他學校展示愛國精神的責任，帶動香港青少年朝着實現中華民族復興的目標前進。」

現場亦派發咗紀念冊，紀念冊上亦有該校過去一年愛國教育嘅活動回顧，但有趣嘅係，竟然包括到英國及紐西蘭遊學。

《教育刺針》創辦人楊穎宇批評，近期香港教育界出現嘅現象，正係「文革式歌功頌德」，但更值得關注嘅係，香港學校竟然需要喺呢個「紅太陽照耀新香港嘅光輝時刻」，派學生代表去培僑中學朝聖，認為「井岡山其實已經形成咗」。

除咗培僑中學嘅「回信一周年分享會」，近日網上流傳一段香港幼稚園學生喺細小嘅校園內舉行升旗儀式。小朋友戴上黃色領巾，升旗後要高唱國歌。

教育局資料顯示，自去年至今有95000學生參加咗「公民與社會發展科」嘅中國考察活動，而「學生內地交流計劃」每年亦提供逾10萬個交流名額，足夠每名學生喺中小學階段，獲得最少一次到中國內地交流嘅機會。《I》