中國平安旗下嘅平安銀行為咗節省成本，要求上海超過100名員工轉移至深圳總部，輿論質疑平安銀行咁樣做其實係變相裁員。

據《北京商報》7月7日消息，網上有知情人士透露，平安銀行決定將上海嘅辦公區域全部遷回深圳，呢個回遷計劃涉及平安銀行嘅信用卡、消費金融及金融市場部門。

平安銀行根據唔同嘅2023年考核標準，設立咗唔同嘅補貼方式。但銀行要求員工喺一個多月內完成所有必要嘅搬遷步驟。呢個補貼政策嘅差異性引發咗部分員工嘅擔憂。部分喺上海擁有房產同埋正喺償還按揭貸款嘅員工更換辦公場地後，意味住唔單止需要承擔深圳嘅租金，生活成本亦會增加，甚至可能出現收入不足以覆蓋額外支出嘅情況。

對於唔願意「搬遷」嘅員工，平安銀行亦會提供離職補償。因此，網上有聲音質疑該行係「變相裁員」同「回遷式裁員」。

平安銀行回應表示，網上關於該銀行變相裁員嘅消息不屬實。該行近期進行總行辦公地點嘅統籌管理，少量員工工作地點須調整。該行將確保業務穩健連續，過程合法合規，並喺保障員工合法權益嘅基礎上進一步加強人文關懷。

其實平安銀行之所以對業務進行改革，背後折射咗該行正承受業績下滑嘅壓力。2023年全年，平安銀行實現營業收入1646.99億元（人民幣，下同），按年下降8.4%；2024年第一季度實現營業收入387.7億元，按年下降14%。

喺該行一向見長嘅零售業務方面，今年第一季度，平安銀行嘅個人貸款餘額達到18781.3億元，較上年末下降5%。除咗住房按揭貸款餘額較上年末基本持平外，經營性貸款餘額、消費性貸款餘額同信用卡應收帳款餘額都出現咗下降。其中，消費性貸款餘額5107.2億元，較上年末下降6.3%，下降幅度超過整體平均水平。

去年6月，平安銀行對高風險產品嘅零售採取壓縮措施，暫時放棄高營收；裁撤咗存在十年之久嘅行業事業部，將地產、綠色金融等六大行業事業部合併為戰略客戶部；撤掉原東區、北區、南區三個區域嘅零售業務管理部；將綜合金融服務中心整合至綜合金融拓展部。平安銀行進行呢啲業務改革，其實反映咗該行正承受住業績下滑嘅壓力。

同時，平安銀行仲傳出咗裁員、降薪嘅消息。今年5月，平安銀行就曾傳出「員工當月績效降薪」嘅消息。

招聯首席研究員董希淼對《北京商報》分析稱，近幾年，銀行業嘅淨利潤增速逐年走低，在呢種情況下，銀行員工嘅薪酬受到影響在所難免。從時間睇，呢種影響仲會持續一段時間。《I》