兩視障人士指控被香港快運「趕落機」 傳「超賣」公司否認並致歉
兩視障人士指控被香港快運「趕落機」 傳「超賣」公司否認並致歉

香港失明人協進會昨日(7日)舉行記者會,指兩名可以獨立外出嘅視障人士被香港快運「趕落機」,而航空公司對呢次事件嘅說法一變再變,前後矛盾。機長以安全為由拒載、航班超賣、無法確認係邊個要求兩人下機等。

 

事件經過

 

事發喺今年5月22日,協會兩名獨立出行嘅會員李俊彥同徐文俊,乘坐下午3點嘅快運航班UO652,由香港飛往日本東京。兩人表示,喺辦理登機手續到閘口登機期間,快運地勤人員一直知道佢哋係視障人士並提供協助,包括帶領前往閘口。機組人員亦主動將佢哋調到較前位置,方便佢哋落機。

 

兩人完成登機後,機組人員前來詢問佢哋是否有父母陪同,如果冇嘅話就唔符合安全規範,要求佢哋落機。在溝通過程中,機組人員態度惡劣,帶領兩人離開嘅機組人員指,機長以安全為由拒絕佢哋乘坐,建議佢哋購買其他航空公司嘅航班。

 

被「趕落機」後,地勤人員指佢哋可以改搭較晚嘅航班,令佢哋非常疑惑,完全唔理解點解換另一架客機就會符合安全規定。兩人向協進會求助,協進會隨即聯絡民航處,喺處方協調下,兩人獲安排改乘同日晚上嘅UO624航班往東京。

 

取回行李時,兩人獲發共240元餐券,發放原因為「Protection from UO652」。翌日兩人要求快運發放書面解釋,快運電郵回覆原因為「Overbooking of flight」,至5月29日再電郵兩人稱會調查事件,並致歉。

 

接近一個月後嘅6月26日,快運致電其中一名當事人,稱向地勤及機組人員了解後,搵唔到當日係邊個要求兩人落機,至7月4日仍未確定,指仍需兩星期調查。7月5日,快運知悉協進會將於7月7日舉行記者會後,於翌日回信兩人,指當日因地勤及機組人員未有一致判斷,須呈報相關部門評估,故兩人未能乘坐原訂航班,喺確認安全後即安排佢哋搭乘另一航班。

 

協會質疑快運說法

 

香港失明人協進會會長黃俊恒表示,兩人購買機票時已通知航空公司佢哋係視障人士,過往亦曾乘坐飛機,佢要求香港快運及其母公司國泰嚴正調查。佢質疑如果香港快運近日嘅解釋屬實,為何事發至今一個多月都未曾聽聞,難以接受,協會會繼續協助兩人追究責任及要求賠償。

 

香港快運回應

 

香港快運航空商務總監王基傑澄清,當日有關航班售出約七成機位,「超賣」說法不符事實,又唔同意「趕落機」嘅指控,指當日機組人員係基於安全考慮作出決定,並由當值人員陪同兩名乘客離開機艙。

 

香港快運對兩位乘客造成嘅延誤和不便致歉,並會作出相應補償,同時已就今次事件檢討並改進工作流程,避免同類事件再發生,重申香港快運一直有嚴謹嘅平等機會政策。《I》

發佈時間: 2024年07月08日 13:48
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.