中國地方債務問題越滾越大，審計署發現有66個縣直接挪用19.51億元人民幣嘅農村學生營養改善補助金，用嚟償還政府債務同支付基層「三保」等支出。雖然中央要求防範同化解地方債務，但多地依然違規舉債。

台灣中央社報道，根據中國全國人大官網消息，審計署審計長侯凱喺6月25日第14屆全國人大常委會第10次會議上報告咗2023年度中央預算執行同其他財政收支嘅審計情況。報告指出，審計其中一項係「重大項目和重點民生資金審計情況」，包括咗「農村義務教育學生營養改善計劃專項資金審計情況」。

重點審計咗13個省份159個縣2021年至2023年8月嘅補助資金231.37億元，占抽查縣同期補助總金額嘅91%。發現主要問題包括補助資金管理使用較混亂。有啲資金「被直接挪用」，66個縣將19.51億元用於償還政府債務同基層「三保」等支出。另外有部份「被變相擠占」，41個縣同1533間學校透過壓低供餐標準、虛構採購業務等，變相截留擠占2.7億元。

審計仲指出，地方債務管理唔夠嚴格。按照國務院關於防範同化解地方債務風險嘅決策部署，各地區全面調查截至2023年3月底嘅政府債務底數，制定化債舉措並積極推進，取得咗階段性進展。

經審計19個省市發現，債務風險總體可控，但仍有兩方面隱患，一係違規舉債尚未全面停止，有24個地區所屬國企透過喺金融資產交易所違規發行融資產品、集資借款等方式向社會公眾融資，至2023年底餘額373.42億元，主要用於支付到期債務、發放工資等，形成政府隱性債務112.58億元。

二係拖欠帳款增加。10個省市56個地區喺按要求建立拖欠台帳後，2023年3月以來又新增拖欠76.31億元，其中5個地區喺無預算安排、未落實資金來源嘅情況下，安排車站等項目建設，新增拖欠69.5億元。有7個省30個地區虛報2023年完成存量清償53.28億元。

報告仲提到「中央部門預算執行審計情況」，發現節慶論壇展會加重基層負擔。按中央關於整治形式主義為基層減負嘅工作部署，審計咗19個省市活動管理舉辦情況，發現24個部門嘅283個活動同217個地區嘅377個活動存在問題，共涉及金額25.32億元。問題包括未經上級批准自行越權審批、違規發放高檔禮品或支付高昂出場費等。

另外，審計仲發現違規培訓同評比表彰等活動屢禁不絕。有所屬單位借助部門或行業影響力，發放「山寨證書」，共取得3.47億元收入。

審計仲發現「違反中央八項規定精神和過緊日子要求」，有啲單位亂花三公經費，例如投資5.45億元建設脫離實際需求嘅酒店，營運9年來累計虧損1.97億元。《I》