《信報》早前發表標題為「國產品牌折戟 北水南調洶湧」嘅評論文章，分析近年大量內地企業來港設立據點、擴張業務嘅真實原因，係為咗有個名正言順嘅理由，調動資金出境。

根據《信報》嘅評論，本港消費市場形勢再度變化，自去年起大批內地餐飲品牌蜂擁來港插旗，一度引發本地餐飲業「深圳化」嘅擔憂。但近日卻傳出多個內地品牌相繼拉閘結業，部分門店甚至喺開業僅4個月後便收檔。

評論提到，一啲國產品牌開業快，結業更快，包括「檸濛濛」、「蘿蔔向南」、「咕嚕丸子屋」同「西塔老太太」等著名內地餐飲品牌，近期相繼喺香港關閉部分或全部分店。呢啲門店大多租約未滿，考慮到開設食肆所需嘅裝修費、廚房設備、員工培訓、申領牌照等前期開支，呢啲門店「極速執笠」更顯不尋常。

評論分析，國產品牌「小型結業潮」背後有三大主要因素。首先係消費者品味嘅問題，儘管「港人北上消費」趨勢火熱，每趟長假期北上消費約有100多萬人次，但相比本港約680萬成年人口，僅佔約兩成左右。如何吸引其餘80%嘅廣大消費者，係大問題。

第二個因素牽涉成本結構。評論提到，唔少港人喜歡北上消費，係因為深圳餐飲價錢普遍較本港便宜一半，同時菜式美味、服務殷勤。但內地食肆嘅呢啲賣點建基於租金、工資、食材等成本遠低於香港。

最後一個因素同「滙款」有關。《信報》指出，內地品牌赴港開店，部分商界人士早已覺得「有蹊蹺」。基於上述嘅消費者品味和成本結構差異，相關品牌喺港插旗根本難以有利可圖。

評論質疑，假若國產品牌真係將香港視為「走出去」首站，點解部分品牌開業未夠半年便退租結業？因此好可能係為咗「滙款」。

評論提到內地近年外匯管制日益嚴厲，一家民企即使賺到數以億元計財富，亦唔容易把錢調到境外。但中央政府支持香港經濟發展、「大灣區」一體化，內地企業有一個名正言順嘅「調錢」理由，就係來港設立據點、擴張業務。

而且因爲本港租金、工資、裝修費等成本高昂，一間國產品牌來港準備數千萬至數億元資金「彈藥」亦好合理，不難獲得國家外管局批准「北水南調」。而做生意有賺有蝕，若經營狀況不似預期，關掉一啲門店都係合理。《I》