華裔人口佔比超過7成嘅新加坡，喺一份2022年嘅跨國民調中，係「唯三」對中國、習近平持正面看法嘅國家。啱啱卸下總理職務交棒畀黃循財嘅前總理、現任國務資政李顯龍警告，所有新加坡人都應該以國家利益為首要考量，必須牢記自己首先係新加坡人。

李顯龍星期三（12日）喺新加坡宗鄉會館聯合總會同中華總商會聯辦嘅致敬晚宴上發言，強調新加坡華族文化喺多元文化環境中非常寶貴，亦係新加坡華人嘅特徵之一。

李顯龍指出，所有新加坡人都應該以國家利益為首要考量。雖然新加坡華人同其他地方嘅華人屬於同一個種族，一些華人認為所有華人都係龍嘅傳人，所以會理所當然咁理解同支持中國嘅立場，但本地人必須牢記，自己首先係新加坡人。

佢表示：「新加坡有自己的利益考量，也有自己要維護的立場，對一位新加坡人來說，這樣的心態是很自然的，也是應有的。」李顯龍仲提到，新加坡喺文化層面上，融貫中西，深受東南亞文化影響，形成具有本土特色嘅華族文化。

眾所周知，新加坡政府嚴控新聞傳播集團，壟斷言論市場，表面上打造咗一個嚴密嘅媒體環境。然而，近年傳統媒體式微，社交媒體興起，讓外國嘅華文信息有機會滲透新加坡社會。

隨著大量中國新移民移入，加上中國政府鋪天蓋地嘅對外宣傳，不僅傳統新加坡華文媒體有時不經意間出現中國觀點；訴求新移民嘅新媒體亦緊跟習近平「講好中國故事」嘅號召；社交媒體、通訊軟件上嘅「中國敘事」更係暗潮洶湧。

民調發現，新加坡華人通常使用社群媒體（74.6%）獲取新聞資訊，其次係新聞網站、電視、廣播，紙本報紙僅有28.5%。常用嘅社交媒體前三名分別係Facebook、YouTube同WhatsApp。雖然民調數據顯示較少新加坡華人直接使用中國社交媒體獲取資訊，但中國宣傳如同暗流，從各大平台流入新加坡人嘅生活圈。

早前，新加坡政府首次引用《防止外來干預法令》，將同北京關係密切嘅新加坡籍港商陳文平，列為「具政治影響力者」，指佢有可能受外國影響，嘗試影響新加坡政治。

今年59歲，已歸化新加坡嘅香港商人陳文平，任職多間房地產公司高層，活躍於新加坡政商界同埋當地港人移民圈子，除咗係啱啱辭任嘅新加坡香港商會會長，同時亦擔任移民團體新加坡九龍會會長。

陳文平同中國同香港政商界有緊密聯繫。陳文平喺2023年3月受邀以「全國政協海外列席代表主席」身分參加「兩會」，為30人代表團之一。喺北京期間，陳文平接受中國《華人頭條》專訪時表示，「各界僑胞代表可以組織一個聯盟…增進僑胞間友誼，凝心盡力為講好中國故事貢獻力量」。《I》