杜拜王子唔嚟香港,不過香港吸引到另一批「財神爺」!港府推出嘅「新資本投資者入境計劃」(新投資移民),大部分申請人竟然嚟自非洲嘅幾內亞比紹同太平洋嘅瓦努阿圖。有財經專欄作家懷疑,有中國移民「出口轉內銷」,先取得外國身份,再藉此移民香港。
為咗吸引更多人才同資金,政府喺去年《施政報告》中提到要重啟資本投資者入境計劃。今年3月1號正式推出嘅「新資本投資者入境計劃」,財經事務及庫務局今日回覆立法會議員簡慧敏嘅質詢時表示,截至5月底,投資推廣署收到3000宗查詢,亦接獲251宗淨資產審查申請,已批出103宗審查申請。而入境處亦接獲90宗入境申請,並「原則上批准」43宗,容許申請人以訪客身份嚟香港投資。申請人以幾內亞比紹同瓦努阿圖最多。
新計劃規定,申請人必須係外國居民或有外國永久居留身份嘅中國籍人士,並需投資最少3000萬港元於指定資產。根據數據,最多申請個案嘅國籍或外國永久居民依次為幾內亞比紹、瓦努阿圖及加拿大,投資推廣署收到嘅淨資產審查申請分別為100宗、92宗同10宗。
有咁多窮國人民選擇移民香港,真係令人意想不到!首先,我哋了解下呢兩個國家嘅背景。幾內亞比紹(Guinea-Bissau)喺非洲西岸,曾經係葡萄牙嘅殖民地,國家面積有3.6萬平方公里,大約係香港嘅32倍,但人口得210萬,仲少過香港。
根據美國中央情報局嘅數據,幾內亞比紹嘅人均GDP只係1,900美元,喺全球224個經濟體中排第209位,係倒數第16,淨係比北韓同南蘇丹好少少。呢個國家多年受戰火摧殘,經濟主要靠出口腰果、魚穫同木材嚟賺取外匯收入。
至於太平洋島國瓦努阿圖(Vanuatu),港人可能會熟悉啲,因為多年前有個移民公司嘅電視廣告:「瓦努阿圖,我想住嘅地方」,令人印象深刻。瓦努阿圖嘅人均GDP比幾內亞比紹稍高,達到2,800美元,排全球第193位。呢個國家人口只有32.6萬,連觀塘區嘅人口都係佢嘅一倍。
雖然過去兩年瓦努阿圖經濟表現唔理想,人均GDP都有負增長,但根據亞洲開發銀行嘅數據,呢個國家前景仲算樂觀,預計今年和明年人均GDP分別有1%和3.6%增長。瓦努阿圖嘅經濟支柱係漁業、離岸金融同旅遊業。
呢兩個國家嘅人民點解會揀香港做移民目的地呢?財經專欄作家「千頌C」喺佢嘅社交媒體上分析話,兩個國家有兩個共通點:一係窮,二係小紅書推得勁。
喺小紅書上輸入「香港投資移民」同呢兩個國家嘅名字,即刻就會出現大量中介教路,話可以先攞到第三國永居身份,再通過投資移民方式攞到香港身份。
有中介更說得坦白,指「小地方有點窮,大多數有錢客戶真要移民居住根本不會選擇這個地方」,「但幾(畿)內亞比紹近期因為香港火了一把,性價比高,沒有居住要求,快速上岸」。《I》