再見免費叉飯奶茶?大陸網紅教「零元遊澳門」  傳當局緊急下令賭場停派小食免影響中小企空間
再見免費叉飯奶茶?大陸網紅教「零元遊澳門」 傳當局緊急下令賭場停派小食免影響中小企空間

早前有內地網紅喺小紅書分享唔使花一分錢喺澳門食喝玩樂一日遊,可能令澳門賭場免費派小食嘅好日子成為歷史!據澳門媒體《亞博匯》引述消息指,澳門政府要求賭場停止提供免費小食,因為當局擔心呢啲做法影響到中小企嘅生存空間。

 

報道提到,疫情後澳門賭場為咗吸引人流,增加免費餐飲區,提供高質素嘅免費小食;再者,賭場仲提供免費穿梭巴士,令內地盛行「0元遊」澳門嘅情況。旅客到達澳門後,搭穿梭巴到賭場,攞免費小食,再搭穿梭巴回口岸。

 

目前內地社交平台小紅書仲有大量澳門免費食喝攻略,有網民分享如何喺澳門賭場享用各類美食,包括十六浦提供免費叉燒飯、豬扒包、奶茶;澳門巴黎人則有金箔叉燒酥、雪糕、金箔鮑魚撻,美獅美高梅派哈根達斯雪糕;新濠天地提供紅豆抹茶鮮奶咖啡等。

 

有人向電台節目反映,擔心博企嘅做法令旅客只停留喺賭場內,影響周邊食肆生意。據了解,部分賭場將改為會員制,需要有消費才能享受優惠。

 

近期小紅書中有唔少內地網民反映,澳門賭場暫停咗免費小食供應,包括永利澳門提供嘅免費茅台拿鐵及巴黎人提供嘅免費金箔雪糕。

 

另有供應商反映,最近數張大額訂單無故被取消,突然收到某間賭場通知要臨時取消訂單,令供應商無故失去數十萬訂單。

 

《亞博匯》指,部分賭場依然有供應免費小食,而賭場職員向記者表示「未收到指示要暫停供應免費小食」。不過,報道引述消息指「由於每間賭場都提供免費餐飲,政府想減少和控制呢件事。」

 

澳門博彩監察協調局據報尚未回應,報道引述澳門負責任博彩協會會長宋偉傑表示,「早兩日已經收到呢個消息,相信近期賭場會陸續改變免費小食供應模式」。

 

至於原因,宋偉傑表示「唔談論其他外在因素,免費小食的確會增加賭場人流…咁是否壓縮了中小企生存空間,賭場方面亦可能考慮到呢個關係,履行社會責任而作出調整」。

 

澳門旅遊局代局長程衛東就回應,統計數字反映,去年全年及今年首季,旅客喺非博彩元素嘅整體消費比2019年增加。除咗內地旅客消費增加,日本同南韓旅客升幅更加明顯,達到兩成至七成。

 

程衛東相信,由於多咗演唱會呢類消費項目,會延長旅客留澳消費時間。當局會再推動社區旅遊,將旅客引流到社區消費。澳門文化局亦繼續推出唔同社區活動,吸引旅客深度旅遊。《I》

發佈時間: 2024年06月13日 15:11
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.