為期四日嘅歐洲議會選舉喺星期日（6月9號）結束，最終投票率達到約51%。最多席位嘅政黨依然係中間偏右嘅歐洲人民黨團（EPP），其次係中間偏左嘅社會黨與民主黨進步聯盟（S&D）。雖然根據選舉結果，主流親歐盟政黨仍然掌握大部分權力，但整體形勢明顯向右傾斜，極左同極右勢力快速崛起。而歐盟兩大核心國家德國同法國執政黨都遭遇慘敗，法國總統馬克龍直接宣布解散國會。

喺720個席位中，歐洲人民黨團攞到184席，而社民進步聯盟攞到139席。其他主要政黨包括支持歐洲主義嘅復興歐洲黨團（Renew Europe），目前攞到80席；傾向右派、懷疑歐盟嘅歐洲保守及改革黨團（ECR）攞到73席。

極右翼民粹主義嘅認同與民主黨團（ID）攞到58席；主張環保嘅綠黨／歐洲自由聯盟（Greens/EFA）攞到52席；左翼聯盟黨團（The Left）攞到36席。而不屬於任何黨團嘅有98席，其中包括德國極右翼嘅另類選擇黨（AfD）。

作為歐盟影響力最大嘅兩個國家，法國同德國備受關注，選舉結果明顯對兩國執政者都係一大警訊。

法國極右翼反對黨國民聯盟（National Rally）係呢次歐洲議會選舉嘅大贏家之一。由瑪麗娜·勒龐（Marine Le Pen）領導嘅國民聯盟攞到大約31%嘅選票，係法國總統馬克龍領導嘅復興黨（Renew Party）得票率嘅兩倍。

喺法國選舉結果公佈之後，馬克龍宣佈解散國民議會，重新舉行選舉，第一輪選舉將喺6月30號舉行，第二輪將喺7月7號舉行。事實上，馬克龍嘅政黨，原本就唔掌握國會多數席位，解散國會被視為係一場政治豪賭。

馬克龍表示：「我已決定通過選舉將議會未來嘅選擇權重新交還畀人民。」國民聯盟領導人Jordan Bardella就話，周日嘅選舉結果標誌住「當政者前所未有嘅潰敗」，佢補充話呢係「後馬克龍時代嘅第一天」。

喺德國，朔爾茨領導嘅社會民主黨亦遭遇慘敗。根據全國出口民調，社民黨得票率排第三，落後於AfD同中右翼聯盟。

另一邊廂，AfD昨（10日）宣佈，該黨重量級議員克拉（Maximilian Krah）因為醜聞纏身，被逐出該黨喺歐洲議會嘅代表團。

克拉原本係AfD呼聲最高嘅候選人，但其後因涉嫌同俄羅斯同中國掛勾而遭調查。佢企圖淡化納粹親衛隊罪行嘅言論，亦導致歐洲議會極右派黨團同AfD劃清界線。今年4月，克拉喺歐洲議會嘅一名助手因涉嫌為中國從事間諜活動而被捕，令佢陷入愈來愈深嘅危機。

AfD發言人證實，該黨喺德國歐洲議會選舉大有斬獲並成為第二大黨之後，該黨新當選嘅議員投票決定將47歲嘅克拉逐出議會代表團。不過，克拉仍然保留喺歐洲議會嘅席位。

克拉同另一名AfD候選人拜斯特隆（Petr Bystron）亦被控收受金錢，喺莫斯科資助嘅新聞網站散播親俄立場，德國當局已就此展開調查。《I》