動畫攻台? 解放軍發佈3D全過程「飛彈洗地」台灣  日媒:施壓但不想升高與美緊張
動畫攻台? 解放軍發佈3D全過程「飛彈洗地」台灣 日媒:施壓但不想升高與美緊張

解放軍一連兩日進行圍台軍演,昨(23日)演習首日,並未發射飛彈。反而今日就發佈咗一部製作相當拙劣嘅攻台3D虛實動畫,片中顯示地面東風導彈、海上艦艇同空中軍機齊齊對台灣發射大量飛彈。點解今次中方似乎更著重「文攻」而「武嚇」相對保守?日本《讀賣新聞》分析,係因為中國唔想升高同美國嘅緊張關係。

 

解放軍東部戰區喺23日、24日組織戰區陸軍、海軍、空軍、火箭軍等兵力喺台灣海峽、台灣北部、南部、東部同金門、馬祖、烏丘嶼、東引島周邊開展「聯合利劍—2024A」演習。

 

東部戰區今日發布多軍種聯合打擊嘅「3D虛實動畫」,模擬東風導彈、海上艦艇同空中軍機對台發射大量飛彈,並集中落喺台北、高雄同花蓮三個區域,指目的係要摧毀「台獨支撐柱」、打擊「台獨大本營」、斷絕「台獨輸血管」。

 

中國國防大學國家安全學院大校副教授張弛昨日接受央視訪問時表示,呢次軍演喺台灣北部、南部、東部進行,分別意義喺於喺台灣北部演練,係對台北政治同軍事重要目標進行威懾,對民進黨當局進行「敲打」。

 

喺台灣南部演練,係為政治上痛擊台獨嘅「大本營」。喺台灣東部演練,係為咗阻斷三條線,包括阻斷台灣能源進口嘅生命線、阻斷台獨勢力逃避制裁嘅逃跑線;阻斷美國同其盟友向台獨勢力提供援助嘅「支援線」。

 

東部戰區23日上午宣布展開軍演後,隨即喺微信公眾號發布附有組合海報嘅文章,介紹參與呢次軍演嘅武器裝備,包含殲-20、殲-16、052D型飛彈驅逐艦、071型船塢登陸艦、東風導彈同箱式遠程火箭炮。

 

日本《讀賣新聞》報導指,中國軍演係為咗回應台灣總統賴清德「520」就職演說提到「中華民國與中華人民共和國互不隸屬」。報導引述前自衛艦隊司令官香田洋二表示:「目前睇嚟,演習規模似乎冇美國前眾議院議長佩洛西訪台時咁大。今次似乎係為咗向台灣新政權施壓,而唔係為咗加劇同美國嘅緊張關係。」

 

報導指,從政治角度睇,喺未來4年賴清德執政期間,中國好可能會拒絕同台灣接觸及展開對話。透過施加軍事威脅,中國要向台灣展示無望同中國恢復經濟關係,藉此動搖賴政權,並製造台灣社會不安。

 

報導指出,對於台灣意識已經扎根、對中國歸屬感薄弱嘅台灣民眾而言,北京嘅強硬路線可能會產生反效果。《I》

發佈時間: 2024年05月24日 15:10
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.