中國經濟持續低迷，唔少人被逼「做散工」，官方美其名曰「靈活就業」，但係依家想投入「靈活就業」大軍都唔係咁容易。事緣中國內地網約車市場已經相當飽和，唔少地方政府公開提醒慎入網約車行業。

網絡預約出租車，簡稱網約車，係中國政府出台嘅與出租車相關嘅管理辦法入面，規定嘅出租車種類之一，其定義係以互聯網技術為依託，構建服務平台，整合供需信息，使用符合條件嘅車輛同駕駛員，提供非巡遊嘅預約出租車服務嘅經營活動。

喺中國內地，網約車包括快車、專車、拼車等各種形式。2016年5月31日，根據中國教育部同國家語委發佈嘅《中國語言生活狀況報告（2016）》，「網約車」入選2015年十大新詞語。

據內媒澎湃新聞報導，舊年開始，中國多個地方宣佈網約車市場出現飽和，唔再核發新嘅營運許可證。呢股風潮持續到而家，除咗地方政府警告經營風險，媒體仲披露每部車每日平均接單量唔超過20單，收入難以達到預期。

包括江西省景德鎮、鷹潭市、江蘇省蘇州市、重慶市、福建省莆田市、河南省商丘市，最近都發布網約車行業風險預警，公開提醒慎入網約車行業，因為多個地方嘅網約車運力已經趨於飽和，或者遠超過實際需求。

由於准入門檻低，加上經濟唔景氣導致有更多人喺疫情後投入，呢啲因素令本來已經競爭激烈嘅中國網約車市場更加嚴峻，不少司機明顯感受到收入銳減。

中國交通運輸管理部門嘅數據顯示，喺眾多網約車平台中，有啲平台唔係經營，有啲平台接入車輛少於50輛，有啲平台每日接單量少於1000單。網約車從業人員嘅經營狀況亦唔樂觀，多地每部車每日平均接單量唔超過20單，平均每單營收大約人民幣20蚊左右，單車每日平均收入只係200多蚊。

即使喺全中國GDP排名第6嘅蘇州，第一季數據顯示，喺蘇州市區每部車每日平均接單量係13.92單，日均營收大約335.39蚊人民幣，每單平均營收約23.93蚊人民幣，其中有46.3%嘅訂單營收介乎10至20蚊人民幣之間。

根據中國國家統計局公佈嘅數據顯示，2021年中國內地「靈活就業」人口已達兩億，占總就業人口近四分之一。《I》