Google稱失望但遵從《願榮光》禁令   湯家驊:可見國安法絕不影響言論或表達自由
Google稱失望但遵從《願榮光》禁令 湯家驊:可見國安法絕不影響言論或表達自由

Google旗下影音平台YouTube表示,將會遵守中國香港法庭對歌曲《願榮光歸香港》嘅禁制令,限制香港用戶瀏覽32條有受禁制內容嘅影片,並同時稱對法庭命令表示失望,指裁決將令人質疑港府促進數碼經濟,以及恢復香港營商聲譽嘅工作,會繼續考慮上訴嘅選項,以促進獲取資訊。YouTube發言人又指,在完成系統處理後,有關歌曲連結,唔會再顯示喺香港嘅Google搜尋引擎結果內。

 

有本地媒體今早嘗試登入禁制令列出嘅32條影片,YouTube會顯示影片受到法庭命令限制,無法觀看嘅訊息,「根據法例,這項內容無法在您的國家/地區網域中播放」。至於含有相關歌曲,但無被列入禁制令嘅影片,就可以繼續播放。

 

被網民嘲諷為「十一哥」嘅行政會議成員、資深大律師湯家驊表示,YouTube將影片下架係負責任同尊重法治嘅做法,指如果有公司認為個別影片唔應受到監管,可以尋求法院澄清或豁免,而唔應自行決定。

 

至於YouTube是否需要喺全球嘅平台將相關歌曲下架,湯家驊認為,要視乎YouTube對社會責任嘅承擔,雖然禁制令未必涵蓋全球,但如果公司喺香港賺錢,在香港運作,就應該尊重香港法律。

 

湯家驊認為,法庭頒布嘅禁制令,有別於將相關歌曲列為「禁歌」,指法庭並無禁止市民管有歌曲,而係禁止利用歌曲作犯法用途,而新聞工作者同學者都可喺禁制令容許下引用歌曲。

 

對於YouTube指,法庭裁決令人質疑香港政府促進數碼經濟,以及恢復香港營商聲譽嘅工作,湯家驊認為並無事實根據,強調法庭處理嘅係危害國家安全嘅事。佢表示,如果同英國檢控香港駐倫敦經貿辦人員嘅事件比較,可見《港區國安法》嘅針對點只係限制於國家同制度層面,絕對唔會影響言論自由或表達自由。

 

港大法律學院客座教授陳文敏日前以「賣刀」作比喻,指買刀嘅人可能無犯法意圖,而且賣方唔能控制買方點樣用刀,認為網上平台只要無顯示相關歌曲係所謂「香港國歌」或提倡「港獨」,就無需要下架。

 

湯家驊認為,相關說法係絕對錯誤,有誤導性,指現時情況同「賣刀」情況唔同,因為相關歌曲已唔斷被人用作犯法,就如有人「賣槍」,如果有好多人到店舖買槍打劫,反問賣方是否仍可本著良心話自己冇責任。

 

成員包括Google、Meta、蘋果公司、X、Yahoo等嘅「亞洲網路聯盟」表示,唔評論個別成員嘅行動,指聯盟正在評估禁制令對企業嘅影響,重申自由開放嘅互聯網,係香港銳意發展為國際創科中心嘅基礎。《I》

發佈時間: 2024年05月15日 13:12
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.