港交所不再披露北向交易實時數據 彭博:唔想外資流出再被披露
港交所不再披露北向交易實時數據 彭博:唔想外資流出再被披露

滬深港三地交易所周一(13日)起不再披露北向交易實時成交額,當中包括實時買入、賣出金額同交易總額等數據,港股通、滬深股通每日額度餘額小於30%時仍會實時公布額度餘額,否則顯示為「可用」;今次變動意味住,市場難以再實時觀察外資經滬股通、深股通買賣A股嘅情況,但三地交易所仍將喺收市後,公布每日同每月成交總額同交易宗數。

 

喺三地交易所上月12日公布調整滬深港通交易訊息披露機制後,香港交易所上周六(11日)嘅通告稱,成功完成推出前嘅測試,有關北向交易嘅實時成交額同每日額度餘額嘅調整喺周一正式實施。當局指調整係要符合國際慣例,但《彭博社》認為,此舉係為咗保護股市漲勢同支撐市場信心,以免遭受潛在嘅負面數據衝擊。

 

同「國際標準」保持一致,係北京當局近期更改數據公佈標準時,廣泛採用嘅理由。呢個「原因」亦被用作中國調整青年失業率計算嘅理據。例如早前國家統計局聲稱,當局唔發布青年失業率數據,係根據「國際標準研究同各國經驗」,將16至24歲之間嘅全日制學生排除在外。

 

對於基金經理嚟講,即時數據對衡量流動性同執行交易至關重要。佢哋經常用呢啲數據報道交易時段外國投資者嘅情緒。呢個舉措可能進一步削弱中國股市嘅可投資性,同埋減弱香港作為股市門戶嘅地位。

 

富布萊特證券(Fulbright Securities)喺香港嘅研究總監Stevan Tam表示:「減少有關互聯互通交易嘅披露會降低市場嘅透明度同可見度,我認為對外國同本地投資者都唔係好嘅措施。」佢續稱:「佢哋嘅目的係為咗盡量減少對A股市場情緒嘅潛在負面影響。」

 

一位外國對衝基金喺華盛頓嘅高管表示,呢個舉措係為咗減少市場波動。「呢啲數字顯示咗可能會影響投資者同機構投資情緒嘅發展方向。」佢表示:「今次嘅改動,就好似中國總理李強唔再主持新聞發佈會咁。」佢無奈表示:「呢啲事態發展具有中國特色,對於一啲管理者嚟講,佢哋冇得揀,只能夠作為參與者遵守遊戲製作者嘅規則。」

 

《彭博社》指出,過去一年A股數度遭遇沉重賣壓,散戶信心惡化,部分要歸因於實時披露嘅數據顯示外資流出,有投資者曾要求當局降低呢類數據嘅透明度。

 

上交所同深交所曾解釋滬深港通交易資訊揭露機制嘅安排,最初係為咗有效揭露、提醒投資者交易額度使用情況,但其揭露頻率同內容跟A股市場資訊揭露嘅一般習慣唔同,都唔同於國際主流市場嘅普遍做法。

 

喺北京當局推出一系列「救市」措施下,A股近期表現續強,滬深港通北向交易持續錄得巨額淨買入,有助推動A股向好,但隨住港交所不再披露北向交易實時數據,投資者未能即時跟風炒賣,對大市影響有待觀察。《I》

發佈時間: 2024年05月14日 13:46
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.