文字獄時代!舉重主席將台、港並列國家遭港府批鬥 社工註冊局被控國安「五宗罪」
文字獄時代!舉重主席將台、港並列國家遭港府批鬥 社工註冊局被控國安「五宗罪」

喺新香港,一啲芝麻綠豆大嘅小事,都會被上綱上線成所謂危害國安嘅大罪。例如香港同台灣選手都有份參加嘅健力錦標賽,香港舉重健力總會主席葉永玉淨係因為以英文致辭時,提到選手來自13個國家(Countries),就被港府大動作批鬥。另外,社工註冊局就被勞工及福利局長孫玉菡羅列「五宗罪」,但其實根本都冇乜嘢。

 

葉永玉喺上周一(6日)舉行嘅「亞洲有裝備健力錦標賽暨亞洲大學生盃」致辭時稱「比賽共有13個國家參與」,但參賽隊伍中有台灣同香港。

 

中國香港特區政府喺上周五(10日)晚發聲明,批評此表述將中國香港同中華台北隊以地區身份參賽嘅事實嚴重不符,涉嫌違反一國原則,「絕對不可接受」,已要求港協暨奥委會展開深入調查,並提出有效改善方案,向政府匯報。

 

總會上周六(11日)晚發聲明解釋,葉主席講稿並非指香港及台灣係國家,完全冇「港獨」嘅意思,解釋佢當時喺發言時發現講稿同實際參賽隊伍數目不符,亦感到句子比較長,所以將句子簡化為13個國家舉重運動員參加,「錯誤地沒有提及地區」。

 

總會表示,完全冇「港獨」意思,堅決支持及擁護《基本法》及「一個中國」原則,該會及主席葉永玉往後必定更小心處理公開講話內容,演講前會覆核講稿內容,確保同類事情不再發生。

 

總會承認此乃嚴重疏忽,對今次開幕演講引起誤會向社會及公眾市民深切致歉,並向中國香港體育協會暨奧林匹克委員會提交報告,陳述事件。

 

另一邊廂,勞工同福利局長孫玉菡早前批評註冊局行徑同決定嚴重偏離《社會工作者註冊條例》精神,並羅列註冊局「五宗罪」,包括《港區國安法》實施後,政府將危害國家安全罪行納入《社會工作者註冊條例》附表2,但註冊局至今未採取行動建立機制,禁止被裁定犯咗危害國安罪行者成為社工。

 

社工註冊局主席伍銳明認為孫玉菡或有誤解,已要求同對方會面。孫玉菡今朝再回應事件,強調「好清楚」社工註冊局工作,「無嘢需要澄清」,重申佢已指出社工註冊局嘅問題,又認為佢所擔憂嘅問題不涉政治,而係註冊局有冇「用好公權力」。

 

《明報》今(13日)引述消息報道,特區政府最快下個禮拜交代改革社工註冊局嘅修例方案,方向料包括改變成員組成比例,令委任成員同政府代表人數多過民選成員。《I》

發佈時間: 2024年05月13日 14:12
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.