中國國安部:外國教授採集自然保護區生態數據危害國安「被處理」
中國國安部:外國教授採集自然保護區生態數據危害國安「被處理」

習近平當局究竟有幾癲?依家就連研究自然環境呢啲根本同政治「九唔搭八」嘅事情都可能惹禍上身。中國國安部今(13日)發文稱,有外國教授喺境外非政府組織支持下,藉「項目合作」名義,非法採集、竊取中國重要自然保護區嘅地理、生物等敏感數據,為「國家安全帶來風險隱患」。

 

中國國家安全部微信公眾號持續發文要求全民警惕各種疑似間諜行為,今日嘅文章「保護生態資源數據安全是每個公民的義務和責任」。

 

文章表示,有自稱某國教授嘅境外人員喺本地人嘅帶領下,喺中國嘅國家級濕地保護區、林場等地,安裝咗好多用於「考察生態環境」嘅儀器設備,建立多處小型觀測試驗場,「非法大量採集了中國重要自然保護區地理、氣象、生物等敏感數據」。

 

國安部繪聲繪影咁講,「您好,我是X國的教授,專程到此開展跨國學術交流,想與您共同考察本地的生態環境,並為您提供豐厚的經費報酬!」指控呢名教授對其以學術合作為掩護,蒐集、竊取中國非傳統領域安全數據嘅事實供認不諱。又話國家安全機關已經會同有關部門,對呢名教授等涉案人員「進行處理」。

 

文章又指,有外國大學喺境外非政府組織(NGO)支持下,同中國西南地區某國家級自然保護區科研管理單位開展自然生態領域科研「項目合作」,甚至話外國為咗了解中國嘅自然環境,仲利用利益拉攏,甚至色情引誘等方式拉中方人員「下水」。


國安機關稱,此NGO背景複雜,「此次實為某西方大國以開展項目合作為掩護」,喺未經中國任何部門批准嘅情況下,非法蒐集、竊取自然保護區核心敏感數據資源,安裝氣象站、布設紅外相機設備、GPS測繪、竊取涉密電腦資料等方式,獲取重要自然保護區大量地理、氣象、生物等敏感數據及圖片資料並向境外傳輸,「對中國生態安全造成嚴重危害」。

 

呢篇文章都對內檢討,指個別生態環境領域企事業單位,在收集、存儲、處理本地生態環境相關數據嘅過程中存在一定失洩密風險隱患;個別生態環境資訊系統存在後門漏洞,「成為境外敵對勢力竊取中國敏感涉密數據的重要攻擊目標」。

 

國安部聲稱,自然保護區嘅地理、氣象、生物等基礎數據,係中國獨有嘅寶貴數據資源,同中國生態安全、生物安全、數據安全等密切相關,未經審批非法採集同跨境傳輸上述敏感數據嘅行為,危害國家安全同利益。

 

國安部警告,根據中國《反間諜法》規定,間諜組織及其代理人以外嘅其他境外機構、組織、個人實施或指使、資助他人實施,或境內機構、組織、個人與其相勾結實施竊取 、刺探、收買、非法提供國家秘密、情報以及其他關係國家安全和利益嘅文件、資料、資料、物品,或策動、引誘、脅迫、收買國家工作人員叛變嘅活動均屬於間諜行為。《I》

發佈時間: 2024年05月13日 13:14
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.